**«Кун пек уява тахҫанах курман», — тенӗ-мӗн __Муркаш районӗнчи__ __Мӑн Сӗнтӗрти__ уява пухӑннисем. Хальхи вӑхӑтра пур ҫӗрлӗн кӗрлекен ял кунӗ пуль тетӗр-и? Мар-ха. Вӑл тӑрӑхри халӑх валли утӑ уйӑхӗн 12-мӗшӗнче вырӑнти райпо пысӑк уяв туса панӑ.**

Мӑн Сӗнтӗрти потребитель обществин савӑнмалӑх-палӑртмалӑх сӑлтавӗ чӑннипех пулнӑ — вӑл 100 ҫулхи юбилейне палӑртнӑ. Вырӑнти райпон «ҫавра» дата ҫывхарнине вӑл тӑрӑхра пурӑнакансем малтанах туйса тӑнӑ: иртнӗ уйӑх тӑршшӗпех райпо лавккисенче «Чи хастар туянакан» акци иртнӗ. Кам пин тенкӗрен ытлалӑх туянать, ҫавӑ лотерейӑна хутшӑнма тивӗҫет. Уявра вара чи хастар туянакансене парнесемпе чысланӑ. Николай Прохоров (уяв пирки хыпарлакан информацире вӑл ӑҫтан пулнине, шел те, каламан), сӑмахран, велосипедлӑ пулса тӑнӑ иккен. Ӑна кӑна чысламан-ха, ыттисене те парне лекнӗ. Кама — пӗчӗк хумлӑ кӑмака, кама — электричествӑпа ӗҫлекен чейник, кама — парне сертификачӗ. Парне списокӗнче ҫавӑн пекех — карас телефонӗ, телевизор, электровентилятор. Пурне те асӑнса пӗтереймӗн...

Уяв вара ирхи вунӑ сехетре мини-футболтан пуҫланнӑ. Райпо кубокне ҫӗнсе илессишӗн 11 ушкӑн мечӗк хӑваланӑ. Хӗрӳ вӑйӑра __Муркаш ял тӑрӑхӗ|Муркаш__, __Мӑн Сӗнтӗр ял тӑрӑхӗ|Мӑн Сӗнтӗр__ тата __Москакасси ял тӑрӑхӗ|Москакасси__ ял тӑрӑхӗсен ушкӑнӗсем малти виҫӗ вырӑна пайланӑ. Пӗрремӗш вырӑн йышӑннӑ муркашсене кубоксӑр пуҫне така та лекнӗ. Иккӗмӗшпе виҫҫӗмӗш вырӑна тухнӑ мӑн сӗнтӗрсемпе москакассисен те кӳренмелле пулман — вӗсене те парнесӗр хӑварман.

Аслисемпе уява килнӗ шӑпӑрлансене те тунсӑхлаттарман уявра. Вӗсем валли театрализациленӗ уявах туса панӑ. Тата клоунӗсем мӗне тӑнӑ! Вар хытичченех кулнӑ пӗчӗкскерсем вӗсене пӑхса. Ачасем валли конкурссем те йӗркеленӗ, дискотека та! Райпо ӗҫченӗсем канихвет пӗремӗкпе те кӑмӑлтан сӑйланӑ.

17 сехетре вырӑнта тавар туса илекенсен апат-ҫимӗҫӗн курав-сутӑвӗ уҫӑлнӑ. Ҫав вӑхӑтра апат-ҫимӗҫе те ас тивсе пӑхма май килнӗ.

19 сехетре вара уява официаллӑ майпа уҫнӑ. Мӑн Сӗнтӗрти райпона юбилейпе Чӑвашпотребсоюз председателӗ — республикӑн Патшалӑх Канашӗн Председателӗ В.М. Павлов, район админитрацийӗн пуҫлӑхӗн тивӗҫӗсене вӑхӑтлӑх пурнӑҫлакан В.К. Ананьев тата вырӑнти ял тӑрӑхӗн пуҫлӑхӗ А.В. Лаптев саламланӑ. Райпо тытӑмӗнче ӗҫлекенсене Хисеп грамотисемпе тата парнесемпе чысланӑ.

Уява концерт тата салют вӗҫленӗ. Ҫук-ха, каҫхи вунпӗр сехетре кӑтартнӑ салют хыҫҫӑн аслисем валли ташӑ каҫӗ пуҫланнӑ. Вӑл ирхи виҫӗ сехетченех тӑсӑлнӑ.