__Муркаш районӗнчи__ __Кашмашри__ информаципе культура центрӗнче пушӑн 17-мӗшӗнче «Яланах театр» ятпа драма кружокӗсен курав-конкурсӗ иртрӗ. Палӑртнӑ вӑхӑта халӑх та пуҫтарӑнчӗ, __Шупашкартан__ ятарлӑ комисси те килсе ҫитрӗ. «Халӑх» ятне тепӗр хут ҫирӗплетсе парас тесе __Кашмашри__ тата __Орининти__ халӑх театрӗн артисчӗсем ҫак саманта тахҫантанпах кӗтсе хатӗрленнӗ ӗнтӗ, ҫапах та хӑйсенче хумханни палӑрать. Кашмашри культура ҫурчӗ ҫумӗнче йӗркеленнӗ халӑх театрӗ жюрипе курма килнисене __Н.Угарин__ пьеси тӑрӑх лартнӑ «Юнланнӑ пӗркенчӗк» драмӑпа паллаштарчӗ. Спектаклӗн режиссӗрӗ — Чӑваш академи драма театрӗн артисчӗ Г.Федоров. «Шупашкарти артистсенчен пӗртте кая мар, питех те лайӑх вылярӗҫ хӑйсене шанса панӑ ролӗсене. Маттур артистсене ятранах асӑнса хаварас килет: Т. Цвыга, Н.Ершов, Г.Ершова, И. Майков, О. Сурикова, П. Борзаев, Р. Николаева, Е. Тихонова.

Оринин театрӗн артисчӗсемпе пӗрле ҫак курава ял тӑрӑхӗн пуҫлӑхӗ А.С. Волков та килсе курма кӑмӑл турӗ, кунта ҫитме машина та уйӑрса пачӗ. Орининсем те Н. Угарин драматург ҫырнӑ «Тӗпсӗр сӑпкари ача сасси» пьеси тӑрӑх лартнӑ спектаклӗн пӗр пайне лартса пачӗҫ. Спектакле тин кӑна __Шупашкари__ культура институтне вӗренсе тухакан ҫамрӑк режиссер — И. Щекурина лартнӑ. Каласа хӑвармалла, Оринин халӑх театрӗ кӑҫал, кӗркунне, хӑйӗн сумлӑ 95-мӗш юбилейне паллӑ тӑвать. Коллективра чылайӑшӗ нумай ҫул ӗҫлесе паянхи кун та хӑйсен пултарулӑхӗпе халӑха савӑнтараҫҫӗ. Акӑ вӗсем: В.В. Васильев, Г.А. Иванова, Л.В. Родионова, В.П. Васильев. Оринин халӑх театрӗ Орининти вӑтам шкулпа питӗ тачӑ ҫыхӑну тытать. Аслисене кура шкул ачисем те сцена ӑсталӑхне кӗҫӗн классенчех туптама пуҫлаҫҫӗ. Паянхи спектакльте ҫакна кӑтартса пачӗҫ те ӗнтӗ ҫамрӑк, театр тӗнчинче хӑйсен пӗрремӗш утӑмсем тӑвакан артистсем: А. Угольников, В.Порфирьева, О. Сорокина. Халӑха хӑйсен ӑсталӑхӗпе тыткӑнласа макӑртма та пултарчӗҫ. Куракансене Надьӑпа, Валеркӑн телейсӗр шӑпи шухӑша ячӗ. Валерка рольне вылякан А.Угольников ҫамрӑк артист калӑпланӑ сӑнар куракансене уйрӑмах асра юлчӗ. «Ку спектакле вӗҫне ҫити курса пӗтерес килетчӗ, спектакль мӗнпе вӗҫленет-ши? — тени илтӗнчӗ халӑх хушшинче килсене саланнӑ май.

__Тивӗшри__ культура ҫурчӗ ҫумӗнчи артистсем сцена ҫине тухсан куракансен сӑн-пичӗ кулӑпа ҫиҫрӗ. Курава хӑйсене тӗллӗн вӗреннӗ артистсем хӑпартлансах хатӗрленни куҫкӗрет. Вӗсем __Николай Айзман__ ҫырнӑ «Ҫӳпҫипе хупӑлчи» пьеси тӑрӑх лартнӑ камитпе паллаштарчӗҫ куракансене. Кулӑшла самантсем чылай камитре. Курма-пӑхма питӗ аван. Куракансем халӑхран тухнӑ Тивӗш артисчӗсене ӑшшӑн алӑ ҫупса саламларӗҫ.

Жюри председателӗ — В.Н. Григорьев, халӑх пултарулӑх ҫурчӗн методисчӗ, курава петӗмлетнӗ май, районти драма ушкӑнӗсенчи хӑй тӗллӗн вӗреннӗ артистсем ҫулран ҫул сӑнарсене лайӑхрах калӑплама хӑнӑхса пынине палӑртрӗ, артистсене кирлӗ сӗнỳсем пачӗ, ӑнӑҫу сунчӗ.