**Хаклӑ ентешӗмӗрсем!

Сире Чӑваш чӗлхи кунӗ ячӗпе саламлатӑп!**

Тӑван чӗлхе — наци культурин управҫи, этемлӗхӗн нумай тӗрлӗ культура пуянлӑхне сӑнарлакан аслӑ та сайра тӗл пулакан паха тупра. Вӑл хутшӑнупа воспитани хатӗрӗ ҫеҫ мар, ҫут тӗнче илемлӗхне тата унӑн тӗрлӗ енлӗхне туллин палӑртма май паракан япала та. Ӑна пула чӑваш халӑхӗн сайра йышши хӑйне евӗрлӗхӗ аваллӑхран пуҫласа паянхи кунччен тивӗҫлипе сыхланса упранать. Тӑван чӗлхе вӑл пирӗншӗн — никамран та хаклӑ аннемӗрӗн асран кайми сӑпка юррийӗ, ҫут тӗнчене пӗлме-курма пуҫланӑ май хамӑр каланӑ пӗрремӗш сӑмахсем. Ӑслӑ Вӗрентекенӗмӗр тата Ҫул пуҫӑмӑр __Иван Яковлевич Яковлев__ пӗтӗм чӑваш халӑхӗшӗн пӗлӳлӗх сӑпки пулса тӑнӑ пӗрремӗш чӑваш шкулне уҫнӑ, тӑван сӑмах паянхи шкулсенчи вӗренӳ класӗсенче, аслӑ шкулсен аудиторийӗсенче, кӗнеке-хаҫат страницисенче, театр сцени ҫинче тата телевиденипе радио эфирӗнче тивӗҫлипе янӑратӑр тесе ырми-канми тӑрӑшнӑ. Паян Чӑваш чӗлхин уявне тӑван халӑхӑн авалхи йӑли-йӗркине тата ӑс-пурлӑх пуянлӑхне ӑруран-ӑрӑва куҫарса пыракан, __чӑваш чӗлхине__ сыхласа упрамалли майсем палӑртакан Раҫҫей Федерацийӗн чылай регионӗнче тата ытти ҫӗршывра та анлӑн паллӑ тӑваҫҫӗ. Хӑй чӗлхине хисеплекен халӑх ытти халӑх чӗлхисене те сума сума пултарасси пирки пӗртте иккӗленместӗп. Пирӗн республика тӗрлӗ наци ҫыннишӗн тӑван кил шутланать, тӗллевлӗн тытса пыракан патшалӑх политики вара халӑхсен культурисене пӗр-пӗрин ҫине ырӑ витӗм кӳме пулӑшать. __Чӑваш чӗлхин кунӗ__ пархатарлӑ туслӑха тата тӗрлӗ халӑх ӑс-пурлӑхне чыслакан савӑнӑҫлӑ уяв пулса тӑчӗ!

Сире ҫирӗп сывлӑх, пултаруллӑ ӗҫре ҫитӗнӳсем, ырлӑх, телей тата юрату сунатӑп!

**Чӑваш Республикин Элтеперӗ М.Игнатьев.**