Чӑваш Енӗн Сывлӑх сыхлав министерствинче кадр улшӑнӑвӗ пулса иртнӗ. Паян министр ҫумне Ирина Лисенковӑна ӗҫрен кӑларма йышӑннӑ. Республика ертӳҫи Олег Николаев алӑ пуснӑ документа Чӑваш Енӗн влаҫ органӗсен официаллӑ порталӗнче вырнаҫтарнӑ.
Министр ҫумӗн пуканне Ирина Лисенкова шӑп та лӑп ҫулталӑк каялла йышӑннӑччӗ. 1985 ҫулта И.Н. Ульянов ячӗллӗ Чӑваш патшалӑх университетӗнчен вӗренсе тухнӑ. «Чӑваш Республикин тава тивӗҫлӗ врачӗ» ята тивӗҫнӗ. 2004-2009 ҫулсенче вӑл сывлӑх сыхлав тата социаллӑ аталану министрӗн ҫумӗнче тӑрӑшнӑ. Сывлӑх сыхлав министерствине куҫиччен Республикӑн стоматологи поликлиникинче оргметодпӳлӗм заведующийӗ пулнӑ.
Шупашкар районӗнчи тӗп пульницӑна 19 дефибриллятор кӳрсе килнӗ. Чӑваш Енӗн Сывлӑх сыхлав министерствин сайтӗнче пӗлтернӗ тӑрӑх, аппарата сывлӑх сыхлавӗн пирвайхи сыпӑкне юсаса ҫӗнетессипе ҫыхӑннӑ программӑпа килӗшӳллӗн туяннӑ.
«Дефибриллятор чӗрепе ӳпке чирӗпе чирлесен реанимаци вӑхӑтӗнче, кардиоплегипе ҫыхӑннӑ операцисенче кирлӗ. Чӗре кӗтмен ҫӗртен чарӑнса ларасран пулӑшать», — ӑнлантарнӑ Шупашкар районӗнчи тӗп пульницӑн аслӑ фельдшерӗ Алевтина Окликова.
Реанимаци оборудованине пульницӑн подразделенийӗсене ҫывӑх вӑхӑтра валеҫсе парӗҫ. 9 дефибриллятора врач амбулаторийӗсене парӗҫ, пӗрне — 1 Ишлейри пульницӑна, пӗрне — Тутаркассинчи участок пульницине. 7 дефибриллятора халӑх йышлӑ вырӑнсенчи ФАПсене илсе кайӗҫ, пӗри район пульницинче юлӗ.
Ӗнер, ҫурла уйӑхӗн 9-мӗшӗнче, Чӑваш Енӗн сывлӑх сыхлав министрӗ Владимир Степанов Шупашкарти пульницӑсенче пулнӑ. Вӑл ҫӗнӗ кӑшӑлвирус инфекцийӗпе чирлӗ ҫынсене епле сипленине тишкернӗ. Республикӑн Сывлӑх сыхлав министерстви Инстаграмра пӗлтернӗ тӑрӑх, кӑшӑлвирусран килте сипленекенсене тӳлевсӗр эмелпе тивӗҫтерессипе йывӑрлӑх пулмалла мар. Препаратсем ҫителӗклӗ.
Хӑш-пӗр пульницӑн тӗп врачӗсене министр сӑмахпа асӑрхаттарнӑ, кӑшӑлвирусран амбулатори мелӗпе сиплесси кал-кал пулса пымалли пирки хытарсах каланӑ.
Инстаграмри асӑннӑ поста вуланисем эмелсене тӳлевсӗр памаҫҫӗ тесе ӑмӑртмалла тенӗ пек комментарисем ҫырнӑ. Ун пеккисене ведомство хӑш пульницӑра ҫавӑн пек пулнине кӑтартма сӗнсе хуравланӑ.
Чӑваш Ене кӑшӑлвирусран пӗр компонентлӑ вакцина кӳрсе килнӗ. Вӑл препарат «Спутник Лайт» ятлӑ. Унпа пӗр хутчен ҫеҫ прививка тӑваҫҫӗ. Пирӗн ҫӗршывра тата республикӑра усӑ куракан ытти препарат икшер компонентран тӑрать: пӗринпе малтан укол тӑваҫҫӗ, иккӗмӗшӗпе — кайран, тепӗр 21 кунтан.
«Спутник Лайт» препарата пирӗн республикӑна 4 500 доза илсе килнӗ. Ӑна, республикӑн Сывлӑх сыхлав министерствинче пӗлтернӗ тӑрӑх, медицина организацийӗсене валеҫсе панӑ.
«Спутник Лайт» — «Спутник V» вакцинӑн ансатрах варианчӗ шутланать. Унпа, маларах палӑртрӑмӑр ӗнтӗ, икӗ хутчен укол туни кирлӗ мар, пӗррепех ҫитет.
Чӑваш Енре ревакцинаци пуҫланӗ. Тепӗр майлӑ каласан, кӑшӑлвирусран пӗрре прививка тутарнисен тепӗр хутчен укол тутарма тивӗ.
Хальхи вӑхӑтра республикӑра 56 вакцинаци пункчӗ, суту-лӳ ҫурчӗсен ҫывӑхнче 14 мобильлӗ вакцинаци пункчӗ ӗҫлет, 58 прививка бригади предприятисене, ялсене тата тухса ҫӳреймен ҫынсем патне тухса кӗрет.
Ревакцинацие пӗрремӗш прививка хыҫҫӑн ҫур ҫултан пурнӑҫламалла.
Прививка кампанийӗ пуҫланнӑранпа Чӑваш Ене кӑшӑлвирусран 291 774 доза вакцина (планпа пӑхса хӑварнинчен 49,5 процент) кӳрсе килнӗ, ҫав шутра — «ГамКовидВак», «ЭпиВакКорона» тата «КовиВак».
Чӑваш Енри тӗпчевҫӗсем республикӑн Сывлӑх сыхлав министерствине пӑхӑнакан учрежденин ӗҫченӗ тата пӗр врач тӗлӗшӗпе пуҫарнӑ пуҫиле ӗҫӗ тӗпчесе пӗтернӗ. Ҫавсем хӑш-пӗр яша хӗсметрен хӑтарма пулӑшнӑ. Ахаль мар. Укҫалла.
Кунта сӑмах министерствӑн «Сывлӑх сыхлавӗн патшалӑх учрежденийӗсене пулӑшас енӗпе ӗҫлекен центрӗ» хысна учрежденийӗн тӗрӗслевпе ревизи пайӗн пуҫлӑхӗн ҫумӗ тата Шупашкарти пульницӑсенчен пӗринче эндоскопистра ӗҫлекен, Ҫӗрпӳ районӗнчи Депутатсен пухӑвӗн депутачӗ пулнӑ ҫын пирки пырать.
Эндоскопист тухтӑр хырӑмра ятарласа суран кӳнӗ, ҫавӑ юхан-суран пек кӑтартма пулӑшнӑ.
Пулӑшупа усӑ куракансем 100 пинрен пуҫласа 200 пин тенкӗ таран сӗтев панӑ. Укҫана 11 ҫынтан илнӗ. Сӗтевӗн пӗтӗмӗшле виҫи 1,5 миллион тенкӗрен иртнӗ.
Ҫав вӑхӑтрах ҫартан пӑрӑнма тӑрӑшнӑ тата сӗтев панӑ каччӑсем тӗлӗшпе те (10 яш пирки) тӗпчевҫӗсем пуҫиле ӗҫсем пуҫарнӑ.
Ҫӗртме уйӑхӗн 12-мӗшӗнче эпир Раҫҫей кунне уявлӑпӑр. Ҫав кун шӑматкуна лекнӗрен уншӑн тунтикун канӑпӑр. Анчах тухтӑрсем яланхиллех хӑйсен графикӗпе ӗҫлӗҫ.
Чӑваш Енӗн Сывлӑх сыхлав министерствинче палӑртнӑ тӑрӑх, ҫӗртмен 11-мӗшӗнче ӗҫ кунӗ 1 сехет кӗскерех пулӗ.
Стационарта тата амбулаторисенче васкавлӑ тухтӑр пулӑшӑвне ҫӗртмен 12 тата 13-мӗшӗсенче ирхи 8 сехетрен пуҫласа 14 сехетчен кӳрӗҫ. Тухтӑра киле чӗнсе илес тесен 13 сехетчен шӑнкӑравламалла.
Тунтикун пульницӑсем шӑматкунхи ӗҫ графикӗпе йышӑнӗҫ. Вӗсем 8 сехетрен пуҫласа 13 сехетчен ӗҫлӗҫ. Поликлиникӑри тухтӑра киле чӗнсе илес тесен 12-ччен шӑнкӑравламалла.
Чӑваш Ене «КовиВак» вакцина килнӗ. Унӑн пӗрремӗш партине «Фармаци» предприятин аптека базине илсе ҫитернӗ, ӑна медицина организацийӗсемпе хулари прививка пунчӗсене валеҫсе панӑ.
Халь кӳрсе килнӗ вакцинӑн тӗп уйрӑмлӑхӗ — эмелӗн черетлӗ дозипе икӗ эрнерен укол туни.
Кашни виҫӗ вакцинӑн упрамалли йӗрки расна. «ЭпиВакКорона» тата «КовиВак» препаратсене холодильникра +2 — +8 температурӑра упрамалла. Ку вӑл вакцина мобильлӗ бригадӑсем валли меллӗ. «Спутник V» валли сивӗрех температура кирлӗ.
«КовиВак» вакцина хальлӗхе пысӑках мар парти кӳрсе килнӗ.
Чӑваш Ене тата тепӗр икӗ йышши вакцина килсе ҫитнӗ.
Маларах кунтисене кӑшӑлвирусран «Спутник V» вакцинӑпа привика тӑватчӗҫ. Халӗ пирӗн тӑрӑха ҫӗнӗ йышшисем, унччен пулманнисем килсе ҫитнӗ. Кун пирки республикӑн Сывлӑх сыхлав министерствинче паян пӗлтернӗ. Пирӗн региона «ЭпиВакКорона» вакцина килме пуҫланӑ. «Гам Ковид Вак» вакцинӑпа танлаштарсан ку препарата инҫе ҫула шӑнтмасӑр илсе кайма май пур.
«ЭпиВакКорона» вакцинӑн пӗрремӗш партине медицина организацийӗсене тата Шупашкарти прививка пункчӗсене валеҫсе панӑ.
Чӑваш Енре «Ӗҫлекенсен сывлӑхне ҫирӗплетесси» корпоратив программи пурнӑҫланать. Республикӑн Сывлӑх сыхлав министерствипе предприятисем ятарлӑ килӗшӳ тӑваҫҫӗ. Хальхинче Владимир Степанов министрпа «Элара» савут гениректорӗпе Андрей Углов ӗҫлӗ хута алӑ пуснӑ.
«Ку килӗшӳ республикӑри ытти предприятишӗн тӗслӗх пулӗ. Ҫак проекта пула ҫынсем производствӑран пӑрӑнмасӑр врачсен пулӑшӑвӗпе усӑ курайӗҫ, вӑхӑтра вакцинаци тата профилактика тӗрӗслевӗ витӗр тухайӗҫ», — тенӗ министр.
«Элара» савутра спорт залӗ пур, унта тӗрлӗ секци ӗҫлет. Ӗҫченсем бассейна ҫӳреме абонемент илейеҫҫӗ», — ӑнлантарнӑ Андрей Углов. Савутра Васкавлӑ медицина пулӑшӑвӗн сывлӑх пункчӗ ӗҫлет. Унтах терапевт тата фельдшер, процедура тата прививка пӳлӗмӗсем пур.
«Ӗҫлекенсен сывлӑхне ҫирӗплетесси» корпоратив программине республикӑри пысӑк тӑватӑ предприятире: Шупашкарти В.И. Чапаев ячӗллӗ производство пӗрлешӗвӗнче, Ишлейри пысӑк вольтлӑ аппаратура савутӗнче, Шупашкарти троллейбус управленийӗнче тата «Т Плюс» предприятин Мари Элпе Чӑваш Енри филиалӗнче — пурнӑҫа кӗртеҫҫӗ.
+2.3 °C