Паян ирхи 9 сехетре Атӑлта, «Виҫӗ юман» дача поселокӗ ҫывӑхӗнче, катер ҫаврӑнса ӳкнӗ. Юрать, ку ӑнӑҫлах вӗҫленнӗ.
Инкеклӗ лару-тӑру министерстви пӗлтернӗ тӑрӑх, катер ҫинче 3 арҫын пулнӑ. Вӗсем ҫаврӑнса ӳксен катертан тытӑнса тӑнӑ. Ҫапла пулӑшу ҫитиччен тӑнӑ. Вырӑна Инкеклӗ лару-тӑру министерствин, транспорт полицийӗн тата республикӑри ҫӑлавпа шырав службин ӗҫченӗсем ҫитнӗ. Ҫӑлавҫӑсем вӗсене пурне те пулӑшнӑ, ҫыран хӗррине илсе ҫитернӗ.
Паян ҫӗрле Канаш хулинчи Ӗҫ урамӗнчи 4-мӗш ҫуртра пушар пулнӑ. Юрать-ха, ку инкек никамӑн пурнӑҫне те татман.
Пушар тухни пирки ҫур ҫӗр иртни 1 сехет те 55 минутра пӗлтернӗ. Инкеклӗ лару-тӑру министерствин ӗҫченӗсем икӗ пӳлӗмлӗ хваттертен 32 ҫулти хӗрарӑма, унӑн 6-ри ачине тата пӗрле пурӑнакан 29-ти арҫынна пусмапа илсе тухнӑ. Виҫҫӗшӗ те сӗрӗмпе наркӑмӑшланнӑ, вӗсене Канашри тата Шупашкарти пульницӑсене илсе ҫитернӗ.
Пушара 40 минутран сӳнтернӗ. Малтанлӑха пӗлтернӗ тӑрӑх, ҫулӑм пирус асӑрханмасӑр туртнӑран тухнӑ.
Ӗнер, утӑ уйӑхӗн 6-мӗшӗнче, Шупашкар районӗнчи Вӑрманкасра ҫамрӑк арҫын путса вилнӗ. Инкеклӗ лару-тӑру министерстви пӗлтернӗ тӑрӑх, вӑл шыва кӗме юраман вырӑнта чӑмпӑлтатма шутланӑ. Ҫитменнине, хӑй ӳсӗр пулнӑ.
Ку инкек 18 сехет те 10 минутра пулнӑ. Путнӑ арҫын 35 ҫулта пулнӑ, Шупашкарта пурӑннӑ.
Палӑртмалла: ҫулталӑк пуҫланнӑранпа республикӑра 14 ҫын путса вилнӗ, вӗсенчен 5-шӗ – ачасем.
Красноармейски районӗнчи Йӗпрем ялӗнче пӗвере ҫамрӑк путса вилнӗ. Вӑл 20 ҫулта пулнӑ.
Инкеклӗ лару-тӑру министерстви пӗлтернӗ тӑрӑх, ҫӗртме уйӑхӗн 27-мӗшӗнче вӑл ӳсӗрле шыва кӗнӗ. Каччӑ Шупашкартан килнӗскер пулнӑ.
Малтанлӑха палӑртнӑ тӑрӑх, каччӑ шыва кӗме юраман ҫӗрте пӗвене кӗнӗ. Унӑн виллине шыравпа ҫӑлав службин ӗҫченӗсем тепӗр кунхине кӑларнӑ.
Ӗнер 16 сехет те 20 минутра Атӑл ҫинче, Чӑваш Ен тата Мари Эл чиккинче, баржӑпа кимӗ ҫапаннӑ. Ку инкек Куславкка районӗнчен инҫех мар пулнӑ.
Моторлӑ кимӗре икӗ пулӑҫ пулнӑ. Малтанлӑха пӗлтернӗ тӑрӑх, пӗри вилнӗ, теприне ҫӑлма май килнӗ.
Инкеклӗ лару-тӑру министерствин Чӑваш Енри тӗп управленийӗ пӗлтернӗ тӑрӑх, халӗ ӗҫ-пуҫа уҫӑмлатаҫҫӗ.
Паян Атӑлта баржӑпа вӗрсе хӑпартмалли моторлӑ кимӗ ҫапӑннӑ. Кун пирки ҫӑлав службине 15 сехет 46 минутра пӗлтернӗ. Ҫапла хыпарлать Инкеклӗ лару-тӑру министерствин Чӑваш Енри тӗп управленийӗ Телеграм-каналӗнче.
Инкек Куславкка районӗнчи Карӑчкин ялӗ ҫывӑхӗнче ҫыранран 300 метр аякра пулнӑ. Вӗрсе хӑпартмалли кимӗре 2 ҫын ларнӑ: 1958 ҫулта ҫуралнӑ арҫын тата 1960 ҫулхи хӗрарӑм. Шел те, арҫын вилнӗ. Хӗрарӑма ҫӑлма май килнӗ.
Ҫу уйӑхӗн 28-мӗшӗнче Патӑрьел районӗнчи Анат Тӑрмӑш ялӗнче арҫын путса вилнӗ. Кун пирки Инкеклӗ лару-тӑру министерстви пӗлтерет.
Арҫын 1996 ҫулта ҫуралнӑскер пулнӑ. Унӑн виллине вырӑна ҫитнӗ водолазсем шыраса тупса ҫыран хӗррине илсе тухнӑ.
Аса илтерер: нумаях пулмасть Канаш районӗнчи Шӑхасан ялӗнче пысӑк инкек пулнӑ. Унта 8-9 ҫулсенчи 3 хӗрача путса вилнӗ.
Ӗнер, ҫу уйӑхӗн 22-мӗшӗнче, ирхи 8 сехетре Вӑрнар районӗнчи Вӑрманкас ялӗнче пушар пулнӑ. Шел те, вӑл ҫыннӑн пурнӑҫне татнӑ.
Пушар Учитель урамӗнчи пӗр ҫуртра тухнӑ. Инкеклӗ лару-тӑру министерстви малтанлӑха пӗлтернӗ тӑрӑх, ҫулӑм пирус асӑрханмасӑр туртнӑран вӑй илнӗ.
Пушара сӳнтерсен 59 ҫулти арҫын виллине тупнӑ. Вӑл кил хуҫи пулнӑ. Халӗ ӗҫ-пуҫа уҫӑмлатаҫҫӗ.
М-7 ҫул ҫинче, Етӗрне районӗнче, йывӑр тиевлӗ машина ҫунма пуҫланӑ. Кун пирки Инкеклӗ лару-тӑру министерстви пӗлтерет.
Машина Кӗҫӗн Тӳмерле ялӗ ҫывӑхӗнче ҫунма пуҫланӑ. Вӑл – пылак ҫимӗҫ турттараканни.
Юрать-ха, водитель ҫулӑма хӑйех сӳнтернӑ. Ҫулӑм двигатель отсекне, кабинӑна сиенлетнӗ.
Юр ирӗлсе ҫӗр тухрӗ кӑна – республикӑра типӗ курӑк ҫуннӑ тӗслӗх пулнине палӑртнӑ.
Инкеклӗ лару-тӑру министерстви пӗлтернӗ тӑрӑх, кун пек тӗслӗх ӗнер, пуш уйӑхӗн 26-мӗшӗнче, Хӗрлӗ Чутай районӗнче пулнӑ. Унта Хватукасси ялӗ ҫывӑхӗнче 16 сехет те 15 минутра типӗ курӑк ҫуннине палӑртнӑ. Вӑл 100 тӑваткал метр ҫинче алхаснӑ.
+11.3 °C