Куçлăх


Куçлăх айĕнчи куçсем


Эс çӳретĕн куçлăхпа.

Вылянать çут кĕленче

Йăлтăр-йăлтăр çутăпа

Сăмсун икĕ айккинче.

 

Куçлăху сан пит хитре.

Вăл сăнна илем кӳрет.

Курсанах ăна, чĕре

Кăкăрта тĕпĕртетет.

 

Çутă линза айĕнче

Сан пытаннă куçусем.

Вĕсенче — асам тĕнче,

Йăлкăшать куçри хĕлхем.

 

Çак пытаннă куçсенчен

Манăн пит пăхас килет.

Анчах икĕ кĕленче

Пăхтармаççĕ ниепле.

 

Илес мар-и куçлăхна,

Тусăм, куçу çийĕнчен?

Чуп тумашкăн-çке сана

Вăл чарать тутусенчен.

Аркадий Русаков | Сăвă | куçлăх | куç | 450