Çул сăмахĕ


Ăçта çеç çитмерĕм пулĕ

Хам кĕске кунçулăмра.

Поэт çулĕ — пурнăç çулĕ, —

Ĕмĕр çуннă çулăмра.

 

Миçе хут-ши вилтĕм-çунтăм, —

Юрăçа вилĕм тивмест.

Ман çĕршывăм — килĕм-çуртăм —

Ывăлне вилĕм сĕнмест.

 

Паттăрне парать вăл пурнăç,

Хăй юнне парать чунне.

Вилĕме çĕнсе кам курнă

Вăл çавна парать чапне.

 

Çӳремерĕм ятшăн-чапшăн

Ачалла пăшал тытса,

Хам çĕршывшăн та чăвашшăн

Эп çӳрерĕм юн тăкса.

 

Таврăнманшăн тусăм-йышăм

Эп çӳреп тĕнче касса,

Юрăçа, эс, халăх, йышăн

Ал парса та ыр сунса.

 

Çулăмра пĕтнĕ тус-тантăш

Калайман сăмахсене

Каласа çӳреп пĕр тăтăш,

Тĕл пулса тăвансене.

 

Хыçăмра Тутар çĕршывĕ,

Умăмра Чăваш тĕнчи, —

Пурăнсан этем ыр-сывă,

Ма пулмасть тăван панче?

 

Тутарта пур савнă ялăм —

Чăваш ялĕ Раккасси.

Туçине тата мĕн калăн —

Вăл та манăн хунькасои.

 

Эпĕ хам тутар чăвашĕ,

Эп чунпа-юнпа чăваш.

Тутар мар. Чăваш урташĕ,

Юррăмпа пултăм Урдаш.

 

Кашни халăх маншăн çывăх,

Хамăр халăх хаклăрах.

Мĕн çинчен çырсан та сăвă,

Чунăм манăн чăвашрах.

 

Ак ума тухрĕ Алманчă,

Ак ума тухрĕ Супар.

Миçе ял мана ал пачĕ,

Супарпа сăмах тупар.

 

Çыннисем хитре Супарăн —

Ваттисем те вĕттисем.

Курасса сире сунмарăм,

Йыхрава ярсан туссем.

 

Илсе килтĕм çул саламĕ

Супарпа Вăрманкаса.

Саламĕ инçе саланĕ,

Тухтăр çеç вăл çапăнса.

 

Ăçта çеç çитмерĕм пулĕ

Хам кĕске кунçулăмра.

Поэт çулĕ — пурнăç çулĕ,

Ĕмĕр ирттĕр халăхра.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: