Пӳлерти Валем хуçа çинчен

Николай Шелепи | Сăвă | 1918 | Пӳлер | Валем хуçа | 2 709


Авал Пӳлертен пĕр çын

Иерусалим хулине

Каять турра кĕлтума

Святойсене пуççапма.

Иерусалиме çитсессĕн,

Ирхине пит васкаса

Пĕтĕм çынран маларах

Каять чиркĕве кĕлтума.

Вăл чиркĕве çитсенех

Пырса çитет пĕр ват çын

Шур сухаллă, шур çӳçлĕ,

Пĕр чарăнса тăмасăр,

Çынпа сăмах хушмасăр,

Кĕрсе каять чиркĕве

Çакă çынран маларах.

Ват çын кĕрсе кайсанах

Урăх çынсем те нумай

Кĕрсе тулаççĕ чиркĕве

Çапса хĕстернĕ пекех.

Пăхать, пăхать çакă çын

Ватă çынна чиркӳре

Анчах нимпе кураймасть

Тем пек хытă пăхсан та.

Тухнă чух та пăхкалать

Пурĕпĕрех кураймасть.

Пит тĕлĕнет çакă çын

Ку кам пулчĕ-ши? — тесе.

Тепĕр кун ирхине татах

Çакă çын пит васкаса

Пур çынсенчен маларах

Каять турра кĕлтума.

Чиркӳ патне çитсенех

Хай ватă çын каяллах

Çакă çынран маларах

Кĕрсе каять чиркĕве.

Палланă пек туйăнать

Çавă çынна çав ват çын.

Анчах сăмах хускатмасть

Пит васкаса кĕнипе,

Куçран çухатас маршăн

Çакă çын та васкаса

Ватă çыннăн хыçĕнчен

Кĕрсе каять чиркĕве.

Анчах епле пăхсан та

Каллех куçран çухатать,

К[ĕ]лĕрен тухнă чухне те

Татах кураймасть ват çынна.

Çакă çын пит ӳкĕнет

Пĕртте калаçайманшăн.

Ăма эпĕ калаçма

Тивĕçлĕ мар-ши? тет, унпа.

Виççĕмĕш кунне татах

Çак çын пур çынран малтан

Чирку алăкĕ умне

Кайса тăрать васкаса

Ватă çынна курасшăн.

Татах хайхи ватă çын

Пур çынсенчен те малтан

Ки[л]се çитет чиркĕве.

Кĕрсе кайма тытăнать.

Çакă çын лайăх паллать

Хăйсен Пӳлер çыннине,

Ватă Валĕм хуçана,

Питĕ хытă тĕлĕнет,

Умне ӳксе пуççапать,

Çапла сăмахсем калать:

«Манран Пӳлерте юлтăн,

Хăçан килтĕн эс кунта,

Ыр çыннăм, ыр хуçам?

Кĕлле кĕнĕ чух курап,

Кĕрсессĕнех çухатап.

Тухнă чух та кураймастăп

Темĕн тĕрлĕ пăхсан та.

Эпĕ питĕ тĕлĕнетĕп,

Турă хвачĕ пур санра».

Ват çын каллех васкаса

Кĕрсе каять чиркĕве.

Вăл чиркĕве кĕрсенех

Пĕтĕм чиркӳ ăш çуталать

Кĕле пĕтсен ватă çын

Чиркӳ алăк умĕнче

Çакă çынна курăнса,

Çапла сăмахсем калать:

«Эп çын т[ă]риччен ки[л]се çитеп

Çын выртиччен таврăнап

Мана кунта никам та

Кураймасть ку чиркӳре.

Халĕ турă хушнипе

Сана анчах курăнтăм.

Пĕтĕм ĕмĕр тăршшĕне

Пĕр усалĕç тумарăм,

Çамрăк чухне вĕрентĕм,

Пĕрт[т]е ахаль тăмарăм.

Çамрăк чухне вĕрентĕм,

Вăй кĕрсессĕн, ĕçлерĕм;

Ватăлсассăн кĕлтурăм,

Турă патне çул турăм.

Ыр кăмăлăмшăн савса

Турă мана пиллерĕ,

Лар ман çия хăвăртрах,

И[л]се каяп Пӳлере».

Ват çын çине ларать çын,

Вăл хушнине итлесе,

Сисмесĕрех юлать çын

Хăйсем Пӳлере çитнине.

Пĕр куç уçса хупиччен

Ки[л]се çитеççĕ Пӳлере.

Унтан ват çын калать ăна

Акă çапла сăмахсем:

«Ырă кăмăлпа ыр ĕçĕмшĕн

Турă мана юратрĕ;

Ятă ĕмĕр тăтăр тесе

Турра кĕлтăвĕç ларса,

Эп пурăнăп турă панче

Усал-тĕселе чарса.

Нумай ырă сăмахсем

Калаçрăм эп санпала,

Çак Пӳлер ту савăнĕ

Ĕмĕр-ĕмĕр манпала».

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: