«Тăшман тени паян та сăхă...»


Тăшман тени паян та сăхă.

Тĕнчен тискерĕсем нумай.

Хура вăя çĕнтертĕр сăвă, —

Çапла калатăп çырнă май.

 

Çынсем паян та тертленеççĕ

Хăрушă пусмăр айĕнче.

Çавна курмасть пулсан поэзи,

Вăл мĕншĕн кирлĕ çĕр çинче?

 

Час-час эп шухăша путатăп.

Илтетĕп, тивĕçĕм чĕнет:

«Этем телейĕшĕн вута та

Кĕмешкĕн хатĕр пул, поэт!»

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: