Электронлă вулавăш

Пĕчĕк çĕклемне пăрахмасăрах йĕкĕте мăйĕнчен ыталаса тытрĕ те хĕр унăн кушăрханă тутине пăшăрханчăк тутипе çулăмлăн, вĕрин çыпçăнчĕ:

— Андрей, Андрюша, Андрюшенька, — хĕр питçăмартийĕ тăрăх икĕ тумлам йăрăл-л! сăрхăнса анчĕ. — Эпĕ — санăн, санăн, санăн...

— Э-э-э, эсĕ, тем йĕместĕн пулĕ те? — ачана çупăрланă пекех хĕре хăй çумне таччăн çупăрласа пăчăртарĕ йĕкĕт. — Вăт, ухмантей, çакнашкал тĕлпулушăн йĕреççĕ-и? Лайăх ку, Христина, лайăх, калама çук лайăх.

— Савăннипе ку, Андрюшенька, савăннипе, — йĕкĕт тутине сĕртĕне-сĕртĕне телейлĕн пăшăлтатрĕ хĕр тути. — Шухăшлама та хăрушă: эпĕ сана çухатма та пултарнă вĕт-ха! Вăт, анра пуç! Тухрăм, çитрĕм тĕпĕртеттерсе... Тен, тухмалла та, тĕпĕртеттерсе те килмелле пулман манăн, э? Тен, çĕнĕреххи, манран та темиçе хут чаплăраххи пур санăн, э?

— Ну-у, мĕн эсĕ, Христина, — пысăк-пысăк чечек çĕклемне йăтăрланăн, ялт! çĕклесе илчĕ те йĕкĕт хĕре, ăнахăлхинчен шӳтлевлĕн-урмăшнăн пăшăлтата-пăшăлтата, çапла халлĕнех пӳрте йăтса кĕчĕ. — Ну, чăтсан чăтса тăр тулĕк, Шупашкар пики. Вăрçап, тăкăлтарап сана айĕн-çийĕн. Хĕсĕрлеп, пусахлап чунна асар-писер. Хупап, кăлармастăп читлĕхрен ĕмĕр-ĕмĕр. У-у-у, кĕленче керменре пурăнакан Кĕлпике. Мана кун чухлĕ асаплантараканчĕр тамăк. У-у-у, килме пĕлнĕ ашапатман. М-м, хр-р-р!..Ха-ха-ха!..

Диван çине хĕрпе юнашар тӳннĕ те йĕкĕт, пӳрте чĕтретсе — çĕр çĕмĕрсе тенĕ евĕр, каçса кайса ахăрать, кулать.

— Ну, вăт, халь ĕнентĕн-и ĕнтĕ эп йăнăш каламаннине? — сĕм-сĕмекке ачалла Христинăна пӳрнипе тĕллесе путишленет каччă. — А эсĕ, вăт, ухмантей, ĕненместĕнччĕ. Пăвăртрăн-пăвăртрăн мана çулталăка яхăн, тарăхтартăн-тарăхтартăн кăра кăмăлупа... Ну, тавай, каласа, пар, епле çитсе ӳкрĕн Анат Сăрмăша?

— Чиперех. Питĕ ансат. Тахçан хăв каласа тăнлантарнă пекех — пăрăнчăка çитиччен автобуспа. Ансан, нумай та утаймарăм — машина, — тĕлпулу саманĕпе кăшт сĕлкĕшленнĕ хĕр те, йĕкĕт ача-пăчалла янкăшнине кура, кулма-савăнма, хĕвеллĕн çиçкĕнме тапратрĕ. — Ну, йĕкĕчĕ вара, шоферĕ — чисти ваккат! «Ăçта каян та,мĕн тума килен те», тесе — веç хăшкăлтарса пĕтерчĕ вĕт.Кам патне кĕрессине каламасăр та хăпмарĕ. — Христинакулма-савăшма чарăнчĕ те каччă еннелле кăлин пăхса илчĕ. — Вăт, клуба чĕнчĕ вĕт çав йĕкĕт мана кĕçĕр?

— Каччи Виталий ятлă мар-и? — çав-çавах янкăшма пăрахмарĕ йĕкĕт. — Çӳç умĕ кăтраскер?

— Çапла, çӳçĕ умĕ кăп-кăтра, — аса илем тенĕ евĕр çамкине пĕркелентерчĕ хĕр. — Салтака кайманнисем, хăйне ашшĕ çĕçĕпе чикнисем пирки сӳпĕлтетсе пĕтрĕ?..

— У-у-у, унтан тем те кĕтме пулать. Ачи вĕри. Ача мар — пăшатан темелле, — тартам-тартам тенĕ куллине тĕппипех сăвĕртрĕ те йĕкĕт, хĕр енне çаврăнса, шутсăр тимлĕхлĕн сăнаса пăхрĕ ăна. Ыйтрĕ. — Ну мĕнле, пурăнатăн эсĕ, Хреççи-Хреççиçĕм?

— Начар.. Питĕ начар, — ыйтăвĕ кĕтмен çĕртенни пулмасассăн та, канăçсăррăн йăшăлтатса илчĕ хĕр. — Çаплах-тăр ĕнтĕ эпир — телейĕ юнашар чухне сисмĕше-курмăша перетпĕр, çĕтме, çухалма тытăннă чухне — хыççăн тĕпĕртететпĕр. Вăт, ăссăрсем. — Христина кăварлăкĕлеткипе йĕкĕт çумнех сиксе ларчĕ. — Кала, Андрей, юрататăн-и эсĕ мана унчченхи пекех, çулталăк каяллахи пекех? Сивĕнмерĕн-и мăшăр тума картса хунă Хреççийӳнтен? Эпĕ, эпĕ килĕшетĕп сан мăшăру пулма...

Хĕр, капла калама хăю çитернипе, тĕмпĕл-л хĕрелсе кайрĕ те тăрук сасăпах макăрса ячĕ:

— Андрей, Андрюшенька, тăванăм... эпĕ çав тери, çав тери ывăнса çитрĕм сансăр, — куççуль витĕр пăшăлтатрĕ унăн тути. — Мĕнешкел тăнсăр пулнă иккен эпĕ, мĕнешкел тăнсăр...

Андрей хăй еннелле туртăнакан хĕре çурăмĕнчен çупăрласа кăкăрĕ çумне сĕвентерчĕ те, калаçа-калаçа, ăна пуçĕнчен лăпкама-ачашлама тапратрĕ.

— Лăплан-ха эсĕ, Хреççиĕм, лăплан. Куççульпе йĕпенсе лармалла-и пирĕн халь? Кӳр-ха, сир-ха аллусене, курам санăн йăлтăр-йăлтăр куллуна, савам савма ĕмĕтленмен питне-куçне, — хыпăнчăклăн сăмахла-сăмахла Христинăна йăпатать йĕкĕт. — Хреççи, нивушлĕ эсех-и вара ку, ытамăмри этемĕм? Ĕненессĕм те килмест. Çакçӳç, çак кĕлетке, çак эсĕ... Шарт тĕлĕнмелле, шарт хытса каймалла! Кĕтмен, шухăшламан çĕртен, сасартăк! Чăн, Хреççи мар пулĕ эсĕ, ылтăн чăмакки, акăш тĕкĕ, тĕлĕкри тĕлĕнтермĕш.

— Çитрĕм Шупашкара, кĕтĕм хамăр çурта, пăхрăм пуштă ещĕкне — унта, хаçатсемпе пĕрле, çыру. Хăпăл-хапăлах вуласа тухрăм эпĕ ăна. Вуласа тухрăм та... — Христина, савнийĕнчен хăпса, тӳрленсе ларчĕ, питçăмартийĕ тăрăх йăлтăртатакан чĕлтĕр-чĕлтĕр куççульне сылтăм алă тӳрчĕпе сисĕнкĕсĕр шăла-шăла типĕтме тытăнчĕ. — Ĕнен, пултараймастăп эпĕ унашкал тума халь çине. Çырăвне вуласа тухнă хыççăн та — иртрĕ, иртрĕ вăхăт. — Ĕнтĕ Христина ĕсĕклеме те пăрахрĕ, çил тăвăнчăкĕ пăшăрхантарнăн, кăкăрĕ хумлăн-хумлăн хăпара-хăпара анчĕ унăн; сăнĕ-пичĕ хăйĕн шухăшлă таçта. — Сисмен мар эпĕ, сиснĕ, чухланă; туяттăнччĕ эсĕ манра тем вăрттăнни, йăпăр-япăрах калама юраманни упраннине, туяттăнчĕ те нимĕн те апла-капла шарламастăнччĕ, кĕтеттĕнчĕ, шанаттăнччĕ, ахăр, хамах пуçласа сăмах тапратасса, — Христина калаçăвне такăнтарчĕ те умĕнчи темĕн тĕлсĕр-палсăра вичкĕннĕн тинкерчĕ, унтан, авăкран, пурнăç çиппине çав тĕлсĕр-палсăртан сĕвем-сĕвемĕн сӳтĕлтернĕн, шăппăн, чĕри ыратнăн шăкăлтатса кайрĕ. — ...Эпир, унпа, Володьăпа, Канашри педучилищĕре паллашрăмăр. Иксĕмĕр те саккăр тин кăна пĕтернĕскерсем, иксĕмĕр те тин кăна вĕренме кĕнĕскерсем,.. Тепле пулчĕ çак: хамăр та сиссе-чухласа ĕлкĕреймерĕмĕр — юратрăмăр пăрахрăмăр пĕр-пĕрне. Пĕр-пĕриншĕн çунма, тунсăхлама тытăнтăмăр. Анчах та нумаях вĕренеймерĕ Володя педучилищĕре, çур çул ытларахран пек вăл, амăшĕ чир-чĕрпе аптăрама тапратнипе, ялне таврăнчĕ. Пăхакан кирлĕ-çке пĕччен хĕрарăма. (Володя — пĕр ывăл).. Хăй те, Володя, харам кĕрмешесех темерĕ курăнать педучилищĕре — чун туртни унăн çар училищиччĕ. «Эх, — тетчĕ Володя екки янă самантсенче, — çак Канаша вĕренме килес мар, сана та тĕл пулаяс çукчĕ вĕт, Хреççи. Вăт пурнăç, вăт путиш-мутиш», — тетчĕ. Амăшĕ каллех ураланнă пек пулсан, вунă класс пĕтернĕ хыççăн тытрĕ те пурнăçларĕ пурнăçларех хăй ĕмĕтне Володя — çар училищине кайса кĕчĕ. Çыру вĕçе-вĕç çӳрететтĕмĕр хамăр, çутăччĕ кăмăлăмăрсем, янкăрчĕ. Володя çар училищинчен тухнă çулне пĕрлешме калаçса татăлсаттăмăр. Калаçса татăласса татăлтăмăр та, шăпа, ав, хурлă шăпа, пирĕн юратăвăмăра чăл та пар аркатса тăкрĕ... — шывланчĕ Христина куçĕ, тикĕс-тикĕс пынă сасси те халсăррăн, шултăркавлăн чĕтрене-чĕтрене тухрĕ. — Ытти çулсенче те тăван ялне тăтăшах килсе тăратчĕ Володя. Юлашки çул тенĕ умĕн те вăл, амăшне курмалла, тăван ялнех килчĕ сахал вăхăта. Ĕнтĕ эпĕ çураçнă хĕр шутĕнчеччĕ, çавăнпа Володьăсем патне уççăнах пырса çӳреме те вăтансах каймастăмччĕ. Володя амăшĕ те мана шутсăрах тараватчĕ, хам та ăна, сăпайлă та тирпейлĕскере, тăван аннене килĕштернĕ пекех килĕштереттĕм... Шыва кĕме утрăмăр Володьăпа. Çитрĕмĕр. Хывăнтăмăр. Шыва усăннă лаштра йăмран тачка туратти çине хăпарчĕ те Володя çав çӳллĕшрен аялалла сикесшĕн пулчĕ. Чун темĕн ырă мара сиснĕ пекех. «ан сик, ан сик», тетĕп эпĕ ăна, «тĕпĕнче тем тĕлне тăрăнăн, малтан анса тĕрĕслесе пăх», тетĕп. Çук, итлемерĕ мана Володя, «эй, мĕн мерекки пултăр унта», тесе сикрĕ те пуçхĕрлĕ, чăмса кĕрсе кайрĕ те... — Христина, куç хӳрисене пухăннă пăтăр-пăтăр куççуль тумламĕсене кача пӳрне вĕçĕпе кăлт-кăлт тĕке-теке типĕтрĕ. — Чăмса кĕрсе кайрĕ те ним сехерленмесĕр... Тухрĕ те пăртакран шывран... Чĕп-чĕр юн хăй — çӳçĕ те, пичĕ-куçĕ те... Тӳнчĕ те çырана... — хĕр, куçĕ умĕнчи синкерлĕхрен тарса пытанасла, питне икĕ аллипе те лап хупласа хучĕ. — Кайран больница... Такам ирсĕрĕ пырса пăрахнă сӳре çине пуç купташкипе çитсе тăрăннă иккен вăл... Пытартăмăр вара Володьăна тепĕр çичĕ кунтан... — çапла каларĕ те Христина, çамки хӳттинче йăпăртлăха тăнăç тупнă аллисем унăн малтан кăкăрĕ тĕлĕпе, унтан чĕрçи тайлăмне йывăррăн, ĕшенчĕклĕн шуса анчĕç. — Халĕ, ак, — кăмака патĕнчи тĕлсĕр-палсăра паçăрхиллех тĕпсĕррĕн тинкерчĕ вăл, — амăшĕ те çук ĕнтĕ çĕр çинче текех. Ăна та, иттуш чылай чăтса пурăнма хал çитернĕскере, пытартăмăр март пуçламăшĕнче. Пĕрехмай калатчĕ мана Володя амăшĕ: «Хĕрĕм, вилнĕ çынпа шăтăка пĕрле кĕреймĕн, хăвна кин тесе курма пӳрмерĕ пулин те, ĕмĕрне хăраххăн пурăнса ан ирттер, чун килĕштернине туп та ача-пăча çитĕнтерĕр», тетчĕ. Каласса калатчĕ те апла — куçĕнче хăйĕн типĕ хуйхăччĕ, иртсен иртсе пĕтми асапчĕ. Çавна кура ăçтан чурăс чунланма пултарнă-ха эпĕ, э? — самантлăха калаçма чарăнчĕ те Христина, савнийĕ енне çаврăнса, чăр-р! пăхрĕ йĕкĕте. — Андрей, ну, мĕн пĕлтерĕшĕ пулчĕ-ха ĕнтĕ çак икĕ çын пурăннинче?.. Çуралнă тейĕпĕр, тĕнче çутине асăнмалăх астивсе пăхрĕç те яланлăхах, ĕмĕрлĕхех сивĕ çĕр айне кĕрсе выртрĕç. Ну, ватти çитсе çĕре кĕрсен татахчĕ хăть. Пурнăçне те пурăнса курнă, тутлине те, йӳççине çителĕклех тутаннă, темелеччĕ. Ах, Володя, Володя... Кала-ха, Андрей, мĕн тума çуралать этем çут тĕнчене?

Те ыйтăвĕ унччен те пĕрре кăна мар канăç паманран, йĕкĕт мĕн тавăрса каласса кĕтсе тăмарĕ хĕр — пуçланă пăшăрханчăкне çав йӳтĕмпех малалла талкăштарчĕ.

— Сасартăк чухласа илтĕм эпĕ çакна. Çил вĕрнине, юр-çумăр çунине, шыв шăнкăртатнине, çулçă шĕпĕлтетнине — пĕр сăмахпа каласан, çĕр калаçнине, хĕвел, уйăх, çăлтăр çутине илтет-курать-тĕк, ĕмĕр-ĕмĕрех чĕрĕ вăл, ĕмĕр-ĕмĕрех сывă этем. Тата çакна та ăнлантăм эпĕ, Андрей. Мĕн тери тӳрĕ пурăнас тесессĕн те, çук иккен пĕрехмай апла халлĕн çеç пурăнма. Куртăм та, акă, сана, туйрăм та, сисрĕм те чуну манăнни иккенне... Пĕлместĕн, капла йăнкăртатса ларса, тен, айванла, кулăшла та курăнатăп пуль эпĕ. Мĕнех, çук, пурпĕрех Володьăна улталани пулмасть ку, ĕнен, Андрей: текех эпĕ те вунçиччĕри йăр-япăш мар ĕнтĕ, ватă хĕр, енчен хĕресленеймен-тĕк утас сукмакăмăрсем ăнсăртран — мĕнешкел тĕрĕсмарлăх пулнă пулĕччĕ ку. Ой, шухăшлама та хăрушă... Андрей, эс ма нимĕн те чĕнместĕн çак? Каçарах, чĕлхе-çăвара ытлашши йӳнетсе ятăм-тăк...

— Чĕнесси-мĕнĕ... — куçранах чăрлаттарса ыйтнăран, тӳрех нимĕн те тавăрса калама аптăрарĕ Андрей Васильевич. — Ара-а... — тăстарарах ячĕ вара вăл пăртакран тытăнчăклăрах сассипе. — Ара, халĕ те хăнăхса çитейместĕп-ха эс юнашар иккенне. Ларатăп, ак, сан шăнкăр-шăнкăр сассуна итлесе. Ни йăпатма ăн çитерейместĕп, — йĕкĕт, хĕре пилĕкĕнчен тытса, ăна каллех хăй еннелле сулăнтарчĕ те, çурăмĕнчен çупăрласа, унăн сылтăм хулпуççине танлăн та çепĕççĕн лăпкама тытăнчĕ. — Чунăм, эпĕ сана ӳпкелĕттĕм-и? Маншăн-тăк, акă, чи кирли, эсĕ пур та сана темрен те мала хуракан эпĕ. Эсĕ, Хреççи, тапратмасăр те пултарнă ку сăмаха... Ăнланатăп: чуну таса çав санăн мĕн те пулин пытарса хăварма, чĕркĕмĕл пек таса. Туяттăм, сисеттĕм пурнăç иксĕмĕре ăнсăртранах курнăçтарманнине. Эсĕ урлă хыпарласассăн та, пуçтартăм-пуçтартăм чăтăма — çапах пуçтарса çитереймерĕм, ирĕк илтĕм те пĕр-ик кунлăха — тухса тапрăм Шупашкара. Шутсăр сана курассăм килнĕччĕ, Хреççи... Мĕн тăвăн, телейĕ çавнашкалли пулчĕ курăнать ман: сăмахлаймарăм курнăçса... Халĕ, ак, пăхатăп та — те ĕненмелле ман ку юмаха, те ĕненмелле те мар? Хреççи, нивушлĕ эсех-и вара ку, нивушлĕ — яланлăхах? — Яланлăхах, Андрей, яланлăхах, — шăпа пӳрнĕ хӳтте кайăк чĕппи евĕрех тĕршĕнчĕ хĕр. — Каламастăнччĕ-и-ха хăвăн класунтах пĕр чипер хĕрача пур тесе? Лайăх вĕренет, художник ĕçне кăмăллать, пысăк малашлăхлă, тесеттĕн? Ма, экзаменĕсене ăнăçлă тытсан, пытăр, пурăнтăр унта... Паллах, ку ула шăтăкĕнчен пăртакран Шупашкара тухса вĕçтерес темесессĕн ху? — йĕкĕт ытамĕнче телейлĕн йăшăлтатса илчĕ Христина, пуçне чалăштарса Андрее питĕнчен чеен тинкерчĕ. — Хам эпĕ, хăть вăрç, хăть хăтăр ĕнтĕ, санпа та канашласа тăмарăм — пуç тавра çавăртăм-çавăртăм та ĕçрен шат та пат! тухса килтĕм. Ялĕ те ял майлах пуль, ача яслисĕр-сачĕсĕр мар-тăр, терĕм. Ытах çук-тăк ача сачĕ-ясли таврашĕ — эп нимĕнле хура ĕçе те тиркесе тăмăп. Вăйăм пур, сывлăхăм çителĕклĕ, тупăнĕ-ха икĕ алла пĕр ĕç... Ĕнтĕ кур та тĕлĕн Хреççийӳнтен! Шăп та лăп сан хăрахху вĕт вăл! Асту-ха, хăв епле пырса çыпçăнтăн кинотеатрта. Мĕн-ха, хăвна та тĕлĕнтермĕш пултăр терĕм — сюрприз!.. Хă, шăлйĕрен! Хă, кулать, хă, кулать. Ма кулан, тетĕп, тӳлтӳк, мă кулатăн?!

Шайăн-вăйăнла, шухăшсăр шухă вăхăтсене аса илнĕлле, чăмăрĕсемпе йĕкĕт кăкăрне тăк-тăк-тăк тăкăртаттарса тĕкрĕ-тирĕнчĕ те Христина, савнийĕ ытамĕнчен вашт! хăтăлса, хĕр-ташăçă евĕр йăрăл-л! шуса тухрĕ урай варринелле. Каччă та пĕр самант тăхтаса тăмасăр — ун хыççăн.

Аллисене саркаласа, кула-кула тапăнса пыракан йĕкĕт серепинчен хăтăласла, кăмака çывăхĕнче пĕрре пĕр еннелле, тепре тепĕр еннелле пăр та пăр варкăшма тытăннăччĕ кăна хĕр — шăп çав вăхăтра алăк уçăлчĕ те пӳрте йĕр çĕклем вутă йăтнă Елькка кĕрех тăчĕ. Ăна курсан, вăрра тытнă чухнехилле, иккĕшĕ те, çамрăксем, аванмарланса хĕрелсе кайрĕç, тем самантра, ним тума аптăраса, урай варринче хытрĕç.

— И-и, хăна та пур-çке, — çĕклемне кăмака умне пăрахса, Елькка çамрăксем патне хыпаланчĕ, салпун аркиле шăлкаласа, Христинăна алă пырса пачĕ. — Тем тесен те, Хреççиех вĕт эсĕ? Кĕтетпĕр-кĕтетпĕр сана. Акă, тинех кĕтсе илтĕмĕр, эппин, хаклă хăнана, тинех кĕтсе илтĕмĕр. Аван-и?

— Аван-ха, Елькка аппа, аванах, — тăснă алла хăйĕн икĕ аллипе те ăшшăн-ăшшăн çупăрларĕ Христина. — Эсир Елькка алла вĕт, çапла-и?

— Çавă-çке, çавă, — хĕре ура тупанĕнчен пуçласа пуç тӳпи таранах куçласа-ачашласа пăхрĕ Елькка. — Алла, пирĕн киле те уяв çитрĕ иккен-ха. Энтри, эсĕ те пулин чавса лартнă юпа пек ан тăр-ха. Хырăмĕ те выçнă пуль килнĕ хăнан. Эккей, систермен. Хам та пахчапа аппаланса... Чим-ха, эп, çиччас, çиччас... Ыран, ак, кăмака хутса, капăртма шăрши те кăларăпăр. Аре, çĕрулми лартса пăрахрăмăр та паян, тасалтăмăр та пĕр чăрмавлă ĕçрен. Чим-ха, чим, эп çиччас, çиччас... Пурте йĕркеллĕ пулĕ... çиччас.

Мăшăр çунат хушăнчĕ тейĕн Ельккана, Андрейăн чиксĕр савăнăçне чухлаканскер, вăл, икĕ савакан чуна татах та хĕпĕртӳ кӳрес тесе, чупса ĕçлеме, пĕтĕм канăçне çухатса, алăкăн-тĕпелĕн вĕçнĕ пек хутласа, сăй хатĕрлеме тапратрĕ.

Ия, нумаях та кирлĕ мар иккен çынна телейлĕ пулма. Ак, Христинăпа Андрей Васильевич тĕлне телей пӳрчĕ те, Елькка та савăнăçлă, ав, Ельккан та килĕ-çурчĕ хăтлăхпа тулли, чăп.

10

Пĕр кана ăсласа çӳрерĕ-çӳрерĕ те Мукуç мучи — тупрĕ-тупрех майне-шывне шухăшласа. «Ĕхĕ, — терĕ вăл шухăшласа çитернĕ шухăшне тĕвĕлесен. — Шĕшлĕ! Эпĕ сана, ку тарана та тăнланмана-ăнланмана, акă, пăхтарам-ха тутантарса шу-утсăр пăрăçлă яшка, эрĕм шывĕпе çăралатса пĕçернине. Тьă-хху, тьă-хху, авăнман-пĕкĕрĕнмен шалча! Ха, курăр-ха, ĕнтĕ ăна, курăр, суккенски! Тăван ачи такамран пек, юнран тăван мăнукне те кĕрсе курма шутламасть вĕт-ха вăл, иçмасса. «Епле пурăнаççĕ-ши, мĕнле-ши?», тесе, пĕрре çаврăнса тухинччĕ хăть. Кай, пулать те этем, ăссăр. Хытă чĕре, чул чун! Ха, чим-ха эпĕ сана, чим, Иван Гаврилччă, шăллăм! Та-ак ташлас килмен çĕртенех ташласа ярăн, ак, хĕртнĕ çатма çинче. Так-ак пушар тухнă чухнехи евĕр ӳппĕн-теппĕн чупкалама тытăнăн. Шĕшлĕ! Непуç, хăв кăмăлу хыççăн çеç ĕрĕхтерсе-йӳçĕнтерсе çуресшĕн пулмалла та-ха эсĕ — э-э, çук, шалишь, тăри те, ав, çӳлте пăрлатса çӳрет-çӳрет те пĕр кана, ĕшенчĕке ерсен, çĕр еннех муклашка пек вăйăн! лаплатса анать. Эсĕ те, шăллăм, ĕмĕр тăршшĕпех пит каппайлансах çӳреймĕн-ха. Хĕсĕнет, ак, санăн та хӳрӳ, каттăршнăй пуçĕ, хĕсĕнмеллипех хĕсĕнет. Каларĕ тесе калăн, ак, хе-хе...»

Çапла пĕр кана вĕршĕнсе-тулашса çӳрерĕ-çӳрерĕ те Мукуç мучи кĕтӳ кĕртсе хĕвел анаспа Иван Гавриловича кĕтме мунчи умне пăрахнă пĕрене çине тухса та ларчĕ. Яланхи йăлипе, вăхăт ирттермелле, кукăр чĕлĕмне пăккин-паккин мăкăрлантарса ячĕ.