Ӗнер «Хыпар» хаҫата ҫырӑнтӑм. Электронлӑ вариантне. Пурӗ те 90 тенкӗ кӑна та тӑкаклах мар.

Мӗншӗн ҫырӑнасах терӗм-ха? Тӗрӗссипе эп кӑҫал кӑрлач уйӑхӗнченех ҫырӑнма шутланӑччӗ. Анчах Туркай хаҫатра ҫӗнӗ орфографипе кӑна мар, ҫӗнӗ терминологипе те кӗрешме пуҫлани питӗ килӗшмерӗ. Ку вӑл ман шутпа чӗлхен аталанӑвӗн ҫулне пӳлнипе пӗрех. Унсӑр пуҫне тӳлевсӗр салатаканскерне ахаль те алла илсе пӑхайратӑп тесе шутласаччӗ.

Ҫавах та хаҫата сӑнанӑ май ҫӗнӗ тӗп редактор ертсе пынипе ҫак йывӑр самантра «Хыпар» улшӑнма тӑрӑшнине куртӑм. Хаҫатӑн ҫӗнӗ пуҫалӗкӗ те ман шутпа питӗ вырӑнлӑ, илемлӗ. Ытлашши ҫукки унӑн «узнаваемость»-не, brand recognition-а, е чӑвашла каласан «хаҫат ятне, хаҫат сӑнне палласа илеслӗхе» хӑпартать. Унсӑр пуҫне, нумай пулмасть, хаҫат сӑнне кӑна мар, хурмине те улӑштарчӗҫ. А3 форматпа туха пуҫларӗ. Ку вӑл ман шутпа хаҫат коллективӗ «Хыпара» лайӑхлатма тӑрӑшнине кӑтартать. Ҫавӑнпа та вӗсене ку тӗлӗшпе мухтас пулать, кӑштах тӗрев парас пулать.

Ӗнер сӑмах май Туркайӗпе хӑйӗнпе те тӗл пултӑм. Вӑл хаҫата малашне пур номере те «Шӑматкун»-хи пекех тӗрлӗ тӗспе кӑларас шухӑшлӑ. Икӗ тӗспе кӑларни хальхи вӑхӑтра вӑл чӑн та иртнӗ ӗмӗрхи япала. Ҫӗнӗ саманалла ӗҫлеме тӑрӑшмалла.

Мухтанипе ҫитӗ, малалла йӳҫҫине палӑртар.

Паян вара пӗрремӗш номер ман алла лекрӗ. 29–30 номерли. 90 тенкӗ нумаях мар-ха та вӑл, ҫавӑнпах пуль электронлӑ ҫырӑнтарӑва кирлӗ шайрах йӗркелесе ҫитереймен. Ак, тӗслӗхрен, ман пата килнӗ ҫырура ытти ҫырӑнакансен электронлӑ адресӗсене те кӑтартнӑ. Манӑннипе пӗрле пурӗ 18 ҫын. Ҫав 17 ҫын та ӗнтӗ хӑйсен ещӗкӗсенче ман ята та, ман электронлӑ адреса та курнӑ. Кунта техникӑна лайӑхах пӗлменни палӑрать. Пӗр ҫырӑва тӳрех темиҫе адресата ярса панӑ чухне «Копия» анапа мар, «Скрытая копия» анапа усӑ курмалла. Вара кашни адресат ыттисенне пӗлмӗ.

Ку пӗчӗк кӑлтӑк тейӗпӗр. Пысӑкки вара хӑй кӑларӑмӗпе ҫыхӑннӑ. Пӗтӗмӗшле ку номере Тӑван ҫӗршыв хӳтӗлевҫин кунне халалланӑ. Ӑна ҫӗршывӗпех паллӑ тӑваҫҫӗ те «Хыпар» хаҫат ниепле те айӑккинче тӑрса юлма пултараймасть ӗнтӗ. Тӗрлӗ саламсем (ҫав шутра партисенчен, предприятисенчен), асаилӳсем уявсем умӗн пулаҫҫех. Кунта ним тӗлӗнмелли те ҫук. Пӗтӗмӗшле илсен те ку кӑларӑм япӑхах пулса тухман, интереслӗ статьясем ҫук мар. Олег Цыпленковран илнӗ интервью, Айхине халалланӑ «...Кунать шӑпа тулӑксӑрри...» Ҫук, шӑпу аслӑ» статья, Ефросиния Сидорова тӗпчевҫӗ пирки тата ыттисем. Анчах та нарӑсӑн 21-мӗшӗнче паллӑ тӑвакан Тӑван чӗлхе кунӗ валли нимӗн чухлӗ те вырӑн тупӑнайман. Вӑт ку мана питӗ пӑшӑрхантарчӗ. Унччен малтан пуҫелӗкӗнче «Чӑваш халӑх хаҫачӗ» пулнине пӗлтерекен хаҫатра ҫак кун пирки манмалла пулманах ӗнтӗ.