Ачасемпе вӗсен ашшӗ-амӑшӗсемшӗн, учительсемшӗн яваплӑ тапхӑр — ҫӗнӗ вӗренӳ ҫулӗ ҫывхарать. Красноармейски район администрацийӗн вӗрентӳ пайӗнчен пӗлтернӗ тӑрӑх, сентябрӗн 1-мӗшӗнче районти шкулсенчи партӑсем хушшине 1950 яхӑн вӗренекен ларӗ. Вӗсенчен 150 ачи — пӗрремӗш хут. Районти шкулсенче пӗлӳ илекенсен йышӗ, пӗлтӗрхипе танлаштарсан, 70—80 вӗренекен сахалрах пулӗ. Сакӑр шкулта пӗтӗмӗшле вӑтам пӗлӳ парӗҫ. Чатукассипе Кӗҫӗн Шетмӗ шкулӗсем кӑҫалтан тӗп пӗлӳ паракан шкулсен шутне кӗрӗҫ.

Ҫӗнӗ вӗренӳ ҫулне хатӗрленсе, районти шкулсенче ҫуллахи каникул вӑхӑтӗнче юсав ӗҫӗсен пысӑк калӑпӑшне пурнӑҫланӑ. Вӗренекенсене тарӑн та ҫирӗп пӗлӳ илме условисем туса парассишӗн сахал мар тӑрӑшнӑ. Пӗтӗмӗшле пӗлӳ паракан 10 шкулти пурнӑҫ хӑрушсӑрлӑхӗн никӗсӗн кабинетне, мӗн пур шкулсен пуҫламӑш класӗсене вӗрентӳпе кӑтарту пособийӗсемпе, оборудованисемпе, кунсӑр пуҫне пуҫламӑш классене сӗтел-пукансемпе тивӗҫтернӗ.

Района тепӗр 27 аудит доски илсе килмелле.

Ҫурлан 10—13-мӗшӗсенче районта пӗтӗмӗшле пӗлӳ паракан учрежденисене ӗҫе йышӑнчӗҫ. Тӑватӑ кун хушши комисси членӗсем вӗсенче ҫӗнӗ вӗренӳ ҫулне мӗнле хатӗрленнине тӗрӗслерӗҫ. Комисси йышӗнче Роспотребнадзорпа патшалӑх пушар надзорӗн, ӗҫ сыхлавӗн службин, район администрацийӗн вӗрентӳ пайӗн, строительство, пурӑнмалли ҫурт-йӗрпе коммуналлӑ хуҫалӑх секторӗн представителӗсем пулчӗҫ. Ҫакна палӑртма кӑмӑллӑ: 15 шкулӗ те вӗренекенсене йышӑнма хатӗр. Уйрӑмах ҫӗнӗ вӗренӳ ҫулне Алманчпа Еншик Чуллӑ вӑтам (директорӗсем — О. В. Димитриевпа Т. А. Беззубова), Упири хупӑ йышши ятарлӑ шкул (Ю. А. Васильев) шкулсем лайӑх хатӗрленнӗ. Хӑш-пӗр шкулсене Роспотребнадзорпа патшалӑх пушар надзорӗн яваплӑ ӗҫченӗсем предписанисем ҫырса пачӗҫ. Ҫӗнӗ вӗренӳ ҫулӗ пуҫланиччен палӑртнӑ ҫитменлӗхсене вӗсенче пӗтерме ҫине тӑрасчӗ. Вырӑнсенче ҫӗнӗ вӗренӳ ҫулне хатӗрленес ӗҫсем малалла пыраҫҫӗ.

Хыпар ҫӑлкуҫӗ

#Чатукасси, #Кӗҫӗн Шетмӗ, #шкулсем, #Красноармейски районӗ, #Упи