Чӑваш Енре хӑш-пӗр учреждение юпа уйӑхӗн 11-мӗшӗнчен QR-кодпа кӗртме тытӑнассине Чӑваш халӑх сайчӗ унччен темиҫе хутчен те пӗлтернӗччӗ-ха. Халӗ пирӗн республикӑра асӑннӑ кода тӗрӗслеме май паракан ресурса хатӗрлесе ҫитернӗ.

Ҫынсене ҫӗнӗ йӗркепе йышӑнма тивӗҫ организацисен qr.cap.ru сайта кӗрсе регистрациленмелле. Унта ятарлӑ мобильлӗ приложение уҫласа илмелли каҫӑ пур тата епле ӗҫлемеллине вӗрентнӗ.

Ҫӗнӗлӗхпе ҫыхӑннӑ мӗнпур ыйтӑва 122 телефон номерӗпе йышӑнаҫҫӗ. Техника енчен пулӑшакансем патне 8 сехетрен пуҫласа 20 сехетчен шӑнкӑравлама май пур.

Кӑшӑлвирусран иммунитет пуррине тӗрӗслесе кӗртме тивӗҫ организацисем шутне ҫаксем кӗреҫҫӗ:

— кинотеатрсем (кинозалсем), театрсем, театрпа концерт учрежденийӗсем, культурӑпа кану учрежденийӗсем, ҫавӑн йышши ытти организаци;

— СПА-салонсем, массаж салонӗсем, солярисем;

— мунчасем, саунӑсем, ҫавӑн йышши пулӑшу кӳрекен ытти объект;

— шыва кӗмелли бассейнсем, фитнес-центрсем, физкультурӑпа спортӑн ытти объекчӗ;

— ресторансем, кафесем, столовӑйсем, буфетсем, барсем, хупахсемпе общество апатланӑвӗн ытти предприятийӗ.

Вӗсене кӗрес тесен е вакцинаци тунине ӗнентерекен документ, е 72 сехет хушшинче тунӑ ПЦР-тест, е кӑшӑлвируспа чирленӗренпе ҫур ҫул ҫитменннине ҫирӗплетсе паракан справка кирлӗ. Вӗсене электрон мелпе те, хут ҫинче те кӑтартма юрать. Документ ют ҫыннӑн маррине ӗнентерме ҫумра паспорт пулмалла.

#учрежденисем, #ҫӗнӗлӗх, #тӗрӗслевсем, #сывлӑх