Электронлă вулавăш

Пехил пек çыраймăп сăвва,

Аттил та ют мар-ха, ман кĕввĕм

Тăван енĕмех куç хывать,

Çурхи папак пек таса тĕввĕм.

Поэзи пуртан пуль тĕнче чухăн мар,

Поэзи парать хĕлхемпе шĕл-кăвар,

Кĕрет чĕрене йăпшăнса, шаккамасăр,

Пĕр сассăр, сăмах каламасăр.

Сăмах вăйĕпе çут тĕнче чечекленĕ,

Чечек хĕлле çурĕ хитре çеçкине.

Илем турри хăй пуль çапла чеченленĕ

Тивлетлĕ тăван та анне чĕлхине.

Поэзи вăл — уйрăм патшалăх,

Ăна чинпала эс виçеймĕн:

Ĕнер тиркени — халь пахалăх,

Паян мухтани — тен, пиçеймĕ...

Сăмахăн тĕп ылтăнĕ — чăнлăх,

Ăна хурласа хуратаймĕç.

Поэзи вăл çамрăк яланлăх,

Ни пенси çук уншăн, ни канăç.

Поэзи пурăнать

Те — çĕр çинче,

те — сывлăшра,

Те — акăш куçĕнче,

те — пахчара,

шур çĕмĕрт айĕнче,

Те — чунăмра,

те — юн тымарĕнче...

Поэзи пурăнать.

Çапах та эп

Ăна курмастăп —

унпала... пуплеп.