Савăн


Савăн,

Сурпансене хывтарса,

Чăваш майра тăвакан;

Учителе пăрахса

Ваккатланса пурнакан!

Савăн,

Кĕлентĕрсем тайтарса

Эрех-сăра сутакан,

Тутарсене пуçтарса

Маткуннĕпе пуякан!

Савăн,

Çемçе тӳшек саракан,

Выртсан — шăма ватакан!

Савăн,

Чире персе ывăлна

Салтак панчен çăлакан;

Халăх пĕлмен анана

Куштансемпе акакан!

Савăн,

Иуда пек чуптуса

Учительна сутакан;

Пĕтĕм яла пăлхатса

Хăвах таса пулакан!

Савăн,

Эрех ĕçсе пăхлине

Этем шутне кӳртекен;

Тӳр çын пырас сукмакне

Чакаласа пӳлекен!

Санран сиен тухнăран

Кунлен сана аслăлар;

Сан урлă хĕн курнăран

Куççулĕпе кĕлтăвар,

Дай бог сана вăрманта

Юман çапса ӳкерме!

Дай бог ватлас кун-çулта

Ачу тытса пĕçертме!

Дай бог çырма ларнă чух —

Ие тыттăр аллуна!

Дай бог суда кайнă чух —

Шур илтĕрех сан куçна!

Вулавçăсен шухăшĕ Вулавçăсен шухăшĕ


саоам (2009-03-21 13:11:59):

Учительсем пирки те, паянхи пурнăç пирки те пит аван каланă.

Чĕлхе илемлĕхĕ: илемлĕ | Шухăшĕ: вăйлă | Содержанийĕ: тарăн

 

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: