Ĕненӳ çитӳллĕ тӳсĕм терцинăсем

Николай Теветкел | Куçару | Иван Франко | 2 223


Манран хăпать-и тертлĕ кун усалĕ?

Манпах çӳрет-ха ĕненӳ айванĕ,

танмарлăх сиввипе сӳнет ăс-халăм,

 

асамлă ĕмĕт уççипе çеç манăн

çĕлен пек йăпшăнса йĕрлекене эп,

анчах терт-нушапа ăçта çухалăп

 

хам тĕнчерен? Ку чăнлăхăн кикенĕ

пăтратрĕ шухăш-кăмăла — тĕтрелĕх

куçа хупларĕ — пур пĕрех ĕненĕп

 

Тивлетлĕ ĕмĕте эп: чун хĕвелĕ

питре йăлкăшмасан мĕнле татулăх

пире сыпăнтарать? Тĕнче илемĕ

 

куçран çĕтсен çухалĕ ĕмĕр çулĕ,

мăч! сӳнĕ ларĕ ĕненӳ хĕлхемĕ —

хуралĕ чурасен çăви салхуллăн.

 

Ашра сăлтавсăр мар вăл мĕлкеленчĕ,

хура ĕçре курпун кăларнă тӳсĕм

ман сăн-питре мăнаçлăн никĕсленчĕ:

 

хăçан-ши ĕненӳ çĕкленĕ тӳсĕм

çул парĕ ăс-хала? Телей инçечĕ

хăçан-ши хĕсĕк пӳртсенче сас парĕ?

 

Хăçан ыр ĕмĕт хыпарçи ултавсăр

куçран пăрать? Тĕнче хурав тумарĕ.

Кил-çуртсăр чурасем хыт ĕмĕтленнĕ

 

хитре пӳртсем тĕлĕксенче çĕкленĕç,

уяртĕç кăмăла. Е пĕлĕтленĕç

куçсем салхулланса: "Суя ку пулнă!"

 

Куççуллĕ сăн-питсем каллех сӳсленчĕк,

ачи-пăчи те выçă, сĕтсĕр юлнă,

ăс-хал та пилсĕр, кăмăл çĕткеленчĕк,

 

нуша ураписем çеç шăвĕç вĕçĕм,

хăюсăр сас саланĕ шикленӳллĕн,

çапла çухалĕ ĕмĕр, çынлăх тĕсĕ,

 

квадригăпа мăнаçлăн, çĕнтерӳллĕн

чупса иртеймĕç мĕскĕнсем: çул - хĕсĕк!

Эпир каллех ав чухăн та куç-пуçсăр,

 

чуна каллех хуçать ултав та çуклăх,

пуш куçлă чин — мăн кăмăллă улшуçă —

çынра шыранă чух услам та сутлăх

 

вăл - Тамерлан. Вăлах таптавлă куçăм

ăшра хăварĕ кăшкăруллă путлăх,

çухалĕ чыс, сăн памĕ ăс илемĕ,

 

яш-кĕрĕм çӳрĕ ĕмĕтри çунатсăр,

сӳнсе çухалĕ юрату хĕлхемĕ,

хамлатĕç выçлăх йыттисем килпетсĕр.

 

Сăнсем шуралĕç, самана сакки те

урасăр юлĕ — ăшă кун урамĕ

чурасене хăçан сив сĕмлĕх витĕр

 

хĕвеллĕн чĕнĕ-ши? Телей турамĕ

хăçан тип кашăка лекет? Ан питĕр

пĕрех ыр шанчăк алăкне эс, сăвăç.

 

Тăванлăх çухалсан тĕнче пушанĕ,

çын мĕлкисем çеç сас-хуравсăр шăвĕç

çĕр сĕмлĕхне. Танмарлăх — мул куштанĕ —

 

чĕресене ав хытă хĕскĕчлесшĕн,

вăлах ав шăршлă сĕмлĕхре тытасшăн

каллех çĕн чурасем. Кашни кĕтесшĕн

 

туп лăплану сăмахĕсем, тархасшăн,

çак çут çанталăк панă тĕс-илемшĕн

çĕр пурнăçне чи тӳсĕмли çеç тăсĕ:

 

ан пăшăрхан, поэт, чунри çĕклемшĕн:

эс — унсăр кам? Пуш сăввусен сив пăсĕ!

Çакна мансан эс пулăн шукăльсемшĕн

 

Мăнаçланса çӳле çĕкленнĕ сăсăл!

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: