Электронлă вулавăш

Малтан Иванов (Петров, Сидоров…), ытла чаплах мар пулин те, литератор пулнă, кĕнекесем те çыркаланă, теççĕ, анчах кайран лит-оратор пулса тăнă: хăй нимĕн те çырман, çынсем çырнине тиркенĕ те мĕнле çырмаллине вĕрентнĕ, çавăн пиркиех ăна пысăк писатель тесе шутланă.

* * *

Хăшпĕр писательсем кĕнеке çырма лариччен малтан рецензент тупса хатĕрлеççĕ, тет.

 

* * *

Авалхи пурнăç çинчен çыра-çыра, М. писатель хăй хăш вăхăтра пурăннине те маннă, тет.

 

* * *

Издательство коридорĕнче икĕ капăр каччă калаçаççĕ:

— Малтан редактор пуласчĕ-ха, кайран вара писатель пулма та йывăр мар!

 

* * *

Алкоголизмпа кĕрешетĕп! — тенĕ те Микулккай писатель, çине тарсах «Черккей» ятлă повесть çырса пăрахнă.

 

* * *

Комеди лартнă каç театрта питĕ лăпкă пулнă: курма пынисем пĕрремĕш акт пĕтичченех çывăрса кайнă.

 

* * *

Сцена çинче спектакль тăршшипех эрех ĕçнине кăтартнă пирки куракансем те ӳсĕрĕлсе кайнă.

 

* * *

Ăнсăртран илтнĕ калаçу:

— Каç-каç ыйхă килменнипе аптратăп. Çывăратакан порошоксем те пулăшмаççĕ. Тем тумалла?

— Ун пек пулсан, эсĕ каç выртсан «Паттăрсем ыйăха парăнмаççĕ» ятлă романа вула. Питĕ пулăшать — наччас çывăрса каятăн!

 

* * *

Тепĕр писатель хăй ĕнер мунча кĕни çинчен те очерк çырма пултарать. Чаракан çук та…

 

* * *

Хуть те ăçта та — хăнана кайсан та, банкетсенче те — Н. писатель çын сывлăхĕшĕн ĕçнĕ. Çавна пула сывлăхне пĕтерсе хунă та хăйĕн юбилейĕнче те тăп-тăр урă ларнă.

 

* * *

Пĕр писатель кашни уяв умĕнех хăлаçланса кăшкăрать: пирĕн колхозсенче пулмалла, пурнăçпа паллашмалла! Вулакансемпе тĕл пулмалла! Атьăр-ха çитес эрнекун «Малалла» колхоза командировкăна каятпăр! Питĕ вăйлă колхоз вăл!..

…«Малалла» колхозра ку писателĕн хуняма карчăкĕ пурăнать.

 

* * *

— Çав Айхаш писателĕн кĕнекисем пур-и унăн? Тем, эп пĕр кĕнекине те вуламан.

— Пур-çке. Иккĕ тан.

— Мĕнле кĕнекесем? Кала-ха эппин.

— Пĕри — профсоюз кĕнеки, тепри — писательсен Союзĕн член билечĕ. Çитмест-им ăна?

 

* * *

— Меметкел текен писателĕн пултарулăхне мĕнлерех хаклатăн эсĕ? Хайне хăй питĕ мухтать вăл, эп талант, эп классик, тесе çухăрать унта та кунта…

— Эп книготоргра ĕçлеместĕп, анчах илткеленĕ… Унăн пултарулăхĕ халь питĕ йӳнĕ, теççĕ: икĕ тенкĕ тăракан кĕнекисене икшер пуспа сутаççĕ, тет. Итту та илекенсем курăнсах каймаççĕ иккен.

 

* * *

Аттуна тăхăн та çăпатуна кăларса ан пăрах, тенĕ авал, эсĕ те икĕ сăвă пичетленĕ хыççăнах хăвна поэт тесе колхозра (заводра) ĕçлеме ан пăрах!

 

* * *

Поэт хушамачĕ янравлă пулнăшăнах унăн сăввисем янравлă пулаймаççĕ çав!

 

* * *

Çынна тара тытса кĕпе-йĕм çĕлеттерме çеç мар, роман çыртарма та пулать, теççĕ.

 

* * *

Уçламасан услам çу пулмасть, çĕрĕн-кунĕн ĕçлемесен кĕнеке пулмасть.

 

* * *

Йăпăлти пăру ик ĕне ĕмет, йăпăлти автор пĕр япаланах ик-виç çĕрте пичетлет.

 

* * *

Чĕлхе-çăвар япшар пулсан, хаяр редактор та çул парать.

 

* * *

Çын çырса парасса шанса, пĕççӳне тăратса ан вырт.

 

* * *

Мухтанасса сахалтарах мухтан, çырассине ытларах та лайăхрах çыр. Çичĕ хут çыр та пĕрре пичетле.

 

* * *

Писательсен билетне алла илнипех классик пултăм тесе ан аташ!

 

* * *

Пĕкĕрен турта тăваймăн, талантсăр çынтан сăвăç тăваймăн.

 

* * *

Шухăша пуç тавра виççĕ çавăр та пĕрре çыр.

 

* * *

Пичетленĕ япăх сăвва каялла çулласа илме çук.

 

* * *

Ахаль лариччен, хăвна ятланă рецензие тепĕр хут вула.

Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —

Хаклав:

Шухăшĕ: --...вăйсăр...мухтамаллах   мар...вăйлă
Чĕлхе илемлĕхĕ: --...илемсĕр...чаплах   мар...илемлĕ
Содержанийĕ: --...ăшах...вăтам...тарăн