Кăвак куçлă Тӳпеме...

Куçу çавах: кăвак, таса;

Шалтан тапса тăрать хăват;

Сассу касса кĕрет ăса —

Сарать ăшра сунман сăвап¹.

Çитет, тархасшăн, ан тухат,

Ята-сума асран кăлар...

Тунса тăма çитмест тахат² —

Сассу вĕрсе чĕртет кăвар...

Хăрушă вăл — синкер³ пушар:

Хыпса илсен çăтса ярать.

Малтан, паллах, кураççĕ шар:

Çăхав, элек, тиркев, хахать⁴...

Унтан... ĕлкĕр! Часрах шăвар,

Лӳшке, сӳнтер — кĕртсем тăна.

Йăмтартăр веç кăвак янкар⁵...

Чĕртсен сыхла ман тайăна⁶.

¹ сăвап – ырăлăх, тасалăх
² тахат – вăй-хăват
³ синкер — хăрушлăх
⁴ хахать – сас-хура
⁵ янкар — тĕтĕм
⁶ тайăн – пурнăçламалли тĕллев

Çĕнĕ комментари хуш