Кӳршĕ ял çумĕнче

Кӳршĕ ял çумĕнче пурччĕ тарăн çырма,

Ешĕретчĕç унта йăмрасем.

Савнипе юнашар хĕвеле тĕл пулма

Эп хываттăм унта сукмаксем.

Тутăрне пĕркенсе, тĕлпулу хистесе

Кĕтейетчĕ мана сар пике!

Ĕмĕте вĕçтерсе, чĕреме çĕклесе

Илĕртетчĕ мана çĕрĕпе!

Ват йăмра айĕнчи шăнкăрти çăлкуçран

Тулли ывăç ăсса тăр шывне,

Çăлтăр пек куçĕпе пăхайса куçăмран

Ĕçтеретчĕ мана ир енне!

Каç тĕтри сирĕлсе шурăмпуç килнĕ май,

Кĕмĕл сывлăм витсен çереме,

Вăл калатчĕ мана: «Вăхăт питĕ нумай,

Ирĕк пар-çке кĕме килĕме!»

Яшлăхри кунĕсем, чунсенчи туйăмсем

Вĕçсе кайрĕç пулас çилпеле.

Малтанхи чун савни! Санпа ман çулĕсем

Питĕ шел, пулаймарĕç пĕрле...

Кӳршĕ ял çумĕнче пурччĕ тарăн çырма.

Ешĕреç-ши унта йăмрасем?

Савнипе юнашар хĕвеле тĕл пулма

Кам хывать-ши паян сукмаксем?

Çĕнĕ комментари хуш