Электронлă вулавăш

Санăн умна çурта çутса ларам-и,

Куркасене сим пыл, шерпет ярам-и?

Куçран пăхса аллусене тытам-и,

Сан куçунта хам сăнăма курам-и?

Кăкру çумне эп пуçăма таям-и,

Хăю тупса сăмахăма калам-и?

Чун-чĕрене сана уçса парам-и,

Чăн юрату, савни, санран ыйтам-и?

Çавăтăнса сад пахчине тухар-и,

Асамлă шăпчăк юррине тăнлар-и?

Çап-çутă уйăх çулĕпе утар-и,

Пĕрне-пĕри савма тупа тăвар-и?

Сана йăтса аллăм çине илем-и,

Çут çăлтăра сан ятупа чĕнем-и?

Чун-чĕрӳне яланлăха кĕрем-и,

Телей патне пĕрле утма чĕнем-и?

Пĕр чарăнми шăпчăкĕсем юрлаччĕр,

Сан куçусем манран тек ан вăтанччĕр!

Чун-чĕресем юратупа тулайччĕр!

Санпа мана пирĕштисем упраччĕр!