Сайккапа Суйкка

Раиса Сарпи | Сăвă | ачасем валли | 1 562


Йăкăлт-якăлт! Йăкăлт-якăлт!

Сикрĕ, сикрĕ, сикрĕ Сайкка.

Йĕчĕ, йĕчĕ, йĕчĕ Суйкка:

— Ай! Сикет кĕпер çине,

Тарĕ кĕç вăрман хыçне!..

 

Йăкăлт-якăлт! Йăкăлт-якăлт!

— Эпĕ сан теттӳ-çке, Суйкка, —

Тет ăна мулкачĕ Сайкка, —

Сикмĕп эп кĕпер çине,

Тармăп эп вăрман хыçне.

 

Йăкăлт-якăлт! Йăкăлт-якăлт!

Сикрĕ, сикрĕ, сикрĕ Сайкка —

Ыр сăмах итлет, ав, Суйкка:

— Пулăп эп ялан санпа,

Эп санпа — хавас сăнпа!

 

Йăкăлт-якăлт! Йăкăлт-якăлт!

Санпала пĕрле сикетпĕр,

Юханшыв патне çитетпĕр,

Сикĕпĕр кĕпер çине,

Тарăпăр вăрман хыçне!

 

Йăкăлт-якăлт! Йăкăлт-якăлт!

Сикрĕ Сайкка, сикрĕ Суйкка,

Сикрĕç, сикрĕç, сикрĕç çуйкăн!

Сикĕç, ак, кĕпер çине,

Тарĕç сĕм вăрман хыçне.

 

Йăкăлт-якăлт! Йăкăлт-якăлт!

Çитрĕç, ак, кĕпер патне,

Ситрĕç, ак, вăрман патне...

Сикĕç кеç кĕпер хыçне,

Сикĕç, ак, вăрман хыçне...

 

Йăкăлт-якăлт! Йăкăлт-якăлт!

Малалла... Аннесĕр шиклĕ...

Сĕм вăрман — кашкăр хушиклĕ...

Суйкка Сайккана каларĕ:

— Каялла сиккелер мар-и?..

 

Йăкăлт-якăлт! Йăкăлт-якăлт!

Сиккелер анне патне.

Харсăр, вăйла çын анне.

Калăпăр ăна çапла:

— Пит хаваслă санпала!

 

Йăкăлт-якăлт! Йăкăлт-якăлт!

Сиккелерĕмĕр хĕмпе!

Кашт çӳре-ха пирĕнпе!

Сиккелер кĕпер патне,

Сиккелер вăрман патне!

 

Йăкăлт-якăлт! Йăкăлт-якăлт!

Сайккана йăл кулчĕ амăш,

Суйккана куç хĕсрĕ амăш,

Сикрĕ вăшт! кĕпер патне!

Сикрĕ вăшт! вăрман патне!

 

Йăкăлт-якăлт! Йăкалт-якăлт!

Сикрĕ, сикрĕ, сикрĕ Суйкка,

Сикрĕ, сикрĕ, сикрĕ Сайкка,

Сикрĕç харсăррăн вĕсем:

Амăшпе сикрĕç вĕсем,

Сикрĕç вăшт! кĕпер патне:

Сикрĕç. вăшт! вăрман хыçне!

 

Йăкăлт-якăлт! Йăкăлт-якăлт!

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: