Микул паттăр

Геннадий Юмарт | Сăвă | 1 326


Тĕнчере çӳрет юмах

(Юмах мар-тăр, чăн сăмах):

Аслă Атăл хĕрринче,

Чăвашсенĕн çĕрĕнче

Микул паттăр хисепре

Хăй ларать тет ĕмпӳре.

Ларать тени тĕрĕс мар,

Ларать теме ĕçсĕр мар:

Ĕçсĕррине ĕç парать,

Ăссăррине ăс парать.

Ертсе пыран халăха

Хăвармасть вăл тăлăха,

Ун хуйхи-суйхи çинчен

Шухăш каймасть пуçĕнчен.

Пурнăçа сăнамалла

Вăл çӳрет ялтан яла.

Тулăх пултăр тет сĕтел,

Хӳхĕм пултăр тет тĕпел.

Пырăр, курăр хулине,

Шупашкарăн кӳллине.

Тирпейленĕ çав кӳлле

Пысăк тĕкĕр темелле.

Пĕрĕхеççĕ пĕрхĕчсем

Йăлтăркка шыв пĕрчисем,

Юмахри лăс юмана

Асилтерсе таçтанах.

Керменсем çĕкленнĕçем

Хӳхĕм çакă вырăнсем.

Тĕрлĕ çĕртен юрлама,

Ăмăртса чупма, курма

Хăнасем килеççĕ тет,

Питĕ тĕлĕнеççĕ тет.

Микул паттăр йăрăсскер,

Йăрăсскер те йăрăскер:

Тухса çӳрет таçта та,

Ăна кирек ăçта та

Хапăлласа кĕтеççĕ,

Татах килсе кур теççĕ.

Тĕнче ăсне ăнкарать,

Хăй те ыр сĕнӳ парать.

Юратмасть тăрлавсăра,

Юратмасть эрех-сăра.

Пит ăста тет кĕрешме,

Кĕрешме те мирлешме.

Ун алли айне лексен —

Лĕнчĕрех лӳчĕркенен.

Хăлха чикки туянăн,

Чикеленсе йăванăн.

Тунă тет вăл ыр йĕрке,

Ямăн хăвна ирĕке...

Çакă Микул паттăра

Туррăмăр упратăрах.

Микул атте-асамçă,

Эс те ăна пăхсамччĕ:

Аташна ан аташтар,

Аталанма ыр ăс пар!

Унпа чăваш халăхĕ

Маттур утать хальĕхе.

Малашне те çавнашкал

Пурăнар эпир кал-кал.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: