Электронлă вулавăш

N. N.

Сутни — тем мар. Сутах.

Куллупала пĕрех

Çиçен ав çап-çутах,

Эп тĕксĕм чух — çиçех.

Анчах сĕрлет темскер

Сан сассунта ялан... —

Мĕскер вăл, — хурт пекскер?

Тен, вăл мĕнне туян.

Сутăнчăклăхпала

Кăшлать вăл сан ăшна.

Кул, — санăн кулмалла!

Пытар — шалти хуртна.

Чун тĕпĕ таранччен

Санпа пĕрлешĕнсе

Вăл юлĕ... — Хăçанччен?

Кул, — «ирĕклĕх» кĕтсе!

«Ырра чĕнсе», тата

Кĕрлемелле... — Кĕрлех.

Тен, калĕç: «Тупата,

Ырсен хыпарçиех».

Эп ченмĕп. «Паттăр» пул.

Пĕлни юлать — манрах.

Эппин, «ним мăр» пек юл.

Сутни тем мар, — сутах.

Кам, мĕн эс?.. Сăвăра

Юлан — ĕмĕрлĕхе?

Пăтрашăн çеç унра,

Историри мĕлке, —

Сăн çук — ун ĕлкинче!

Пĕлтермĕп — «кам мĕнне».

Поэзи тĕтринче

Çухатĕç сан йĕрне.