Атте алли


Эп вăхăт валемне çĕклетĕп.

Йăтма вăй пур-ха кăкăрта.

Атте çулне кĕçех çитетĕп.

Вăл вилнĕ хĕрĕх тăххăрта.

 

Пурăнаймарĕ вăрăм ĕмĕр.

Куç хупаймарĕ килĕнче.

Ăна çунтарчĕ вăрçă хĕмĕ,

Пĕтерчĕ Витебск патĕнче.

 

Куççуль юхса анать-çке шăпăр

Атте шăпишĕн хурланса

Пĕр ачинчен пĕр татăк çăкăр

Вăл кураймарĕ тутанса.

 

Пӳрне хуçса пире шутлатчĕ,

Çитместчĕ аллинче пӳрне.

Çулран-çулах йыш хушăнатчĕ, —

Лекетчĕ ячĕ аннене.

 

Миçен пулсассăн та — саватчĕ.

Юлман-ха, тетчĕ, кĕлмĕçе.

Хыт аллипе пуçран шăлатчĕ.

Тĕк пек вăл туйăннă çемçе.

 

Патак та тивнĕ, кам-ха тунĕ?

(Хул-çурăм халь те астăвать.)

Судне атте пĕччен хăй тунă,

Хăех вăл пулнă адвокат.

 

Ачалăх пĕлĕчĕ тăп-тăрă.

Эп шырамастăп айĕпне.

Пускил ачи тусассăн вăрă

Мана та лекнĕ сых ятне.

 

Санран çуралнисем — хăюллă.

Кăштах илем-и мухтанса?

Хăратмалла эс йăтнă хулă

Вĕрентнĕ çамрăклах ăса.

 

Мĕнпе-ши татăлĕ çак парăм?

Йăнăшасси пулать-ха ман.

Хам пурнăçа, аттеçĕм, парăп

Тăрса эс «тăн кĕртес» пулсан.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: