Санăн пулас хĕрне

Геннадий Айхи | Сăвă | 1954 | 1 691


Сар сăмсаллă кайăк,

Манăн кайăк эс!

Маншăн питĕ лайăх

Тĕпелти кĕтес.

 

Икĕ тяппине те

Кӳр-ха, пар мана,

Слон пек ӳсĕретĕп,

Ан хăра кăна.

 

Эпĕ — хреснаçу сан,

Шеф пек япала...

Иккĕн, пĕчĕк тусăм,

Халь пĕр май пулар.

 

Кушака тытар та

Сĕтĕрер пĕрле,

Кукаму ятлатăр,

Эпĕ — хӳтĕлем.

 

Ӳс-ха, пĕчĕк çыннăм,

Тапкалаш, выля...

Валя, Валентина,

Чăвашла — Валя.

 

* * *

Пĕчĕк хĕрлĕ тупă,

Пиçĕ тупă пек,

Эс часах ак чупăн

Кантăк умĕпе.

 

Ун чухне эп пулăп

Пысăк бюрократ.

Эсĕ — кĕр хăюллăн,

Ман шкапа пăтрат.

 

Пирĕн Кĕçтенттинĕн

Юмахне вула.

Валя, Валентина,

Чăвашла — Валя.

 

* * *

Хреснаçу сухалĕ

Икĕ шит пулсан,

Ун патне эс, Валя,

Кĕрĕн хушăран.

 

Пӳлĕмре — тусанлă,

Пахчара — вĕлтрен...

Хреснаçу сан савнă

Ĕлĕк пĕр хĕре.

 

Куçлăхне шăлкалĕ

(Нӳрленет текех!):

— Валентина, Валя,

Эс аннӳ пекех...

 

* * *

Хамăр ен Михайлов

Мускавран юрлать,

Сан аннӳ ахаль вăл

Кантăкран пăхать.

 

Шываллах чăмаççĕ

Ик хура чĕкеç...

Маншăн вăл — кумма çеç,

Уншăн эп — кум çеç.

 

Сан аçу çаплах ав

Шав пирус туртать.

Эп кайсан — пăрахĕ:

Пачки пушанать.

 

Лавккана ан кайтăр

Вăл пирус илме, —

Манăн каймалла-тăр

Хамăн килĕме.

 

Тунсăхлать пуль йыттăм,

Пĕчĕкçĕ Улай.

Ытала та хыттăн —

Çывăрмашкăн кай.

 

* * *

Манăн тепĕр килĕм

Пысăк хулара.

Эп сана асилĕп

Шавлă Мускавра.

 

Кĕнеке хакне çеç

Пĕлнĕ студента

Парĕç те стипенди —

Утăп Арбата.

 

(Шаннă çип, илтсеччĕ,

Сăнчăра тăрать.

Çав пулать стипенди —

Пĕлĕн каярах.)

 

Сан валли хăварăп

Çирĕм тенкине,

Пуштăпа эп ярăп

Ултă пукане.

 

Аннӳ шăппăн кулĕ,

Калĕ: «Апăрша»...

Пин-пин ылтăн пуллăн

Чӳхенет ăрша.

 

Пул-ха вашаватлă,

Çӳçпе ан выля.

Аннӳпе пĕр ятлă

Пĕчĕкçĕ Валя...

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: