Çулсем

Аркадий Ĕçхĕл | Сăвă | 1949 | çул | Канаш | Мускав | 2 326


Эп малтан çуран утатăп

Тӳрĕ, такăр сукмакпа.

Çутă иршĕн савăнатăп,

Киленетĕп улăхпа.

 

Таврара йăл-йăл кулаççĕ

Сывлăм сыпнă чечексем,

Мана ăшшăн саламлаççĕ

Илĕртӳллĕ куçĕсем.

 

Кăмăл ырă-çке ытла та,

Улăх тăрăх утнăçем

Кĕвĕлетĕп те юрлатап

Чи илемлĕ юрăсем.

 

Самантрах çапла тухатăп

Çывăхри шоссе çине,

Эпĕ савăнса пăхатăп —

Çул инçе пире чĕнет.

 

Çул тӳп-тӳрĕ те çап-çутă,

Икĕ енĕпе — вăрман.

Манăн та, сан аслаçу та

Кун пекки авал курман.

 

Эп кăштах кĕтсе тăратăп,

Ак автобус та килет!

Чарăнать вăл, эп ларатăп,

Туянатăп пĕр билет.

 

— Ак кунта сан вырăн, — теççĕ, —

Ларт кунта чăматанна. —

Тăванла кĕтсе илеççĕ

Палламан çынсем мана.

 

Лартăм, малалла вĕçетпĕр,

Кĕскетсе инçе çула.

Тулă хирĕ, тинĕс евĕр,

Хумханса кăна юлать.

 

Çутçанталăк илĕм-тилĕм

Çутă иршĕн савăнать.

Пире хирĕç кăнтăр çилĕ, —

Çу хĕвелĕ сапăнать.

 

— Юрттарах, — тесе юрлатпăр, —

Юхăм юртăллă лаша!

Çил пекех çитсе тăратпăр

Капăрланнă Канаша.

 

Çитĕнет, кĕрлет хуламăр —

Аслă çул çинчи хула.

Сарăлать кашни урамĕ

Çĕнĕ ĕмĕре пула.

 

Халь ун витĕр ирĕн-каçăн,

Пĕр пĕлмесĕр канăçа,

Тĕрлĕ пуйăссем васкаççĕ

Тухăçа та анăçа.

 

Пуйăспа кĕçех эпир те

Ăсанатпăр васкавар

Хир-хир урлă, вăрман витĕр,

Аслă, чаплă Мускава.

 

Малалла! Умра — çул уçă.

Километр юписем

Вĕлтлетсе иртсе юлуçăн

Вăранаççĕ шухăшсем.

 

Çĕршывра пин-пин çул пулĕ,

Миллион та пулмалла, —

Вĕсенчен кашни-пĕр çулĕ

Туртăнать Мускавалла.

 

Çĕр çинче те, сывлăшра та

Çуталаççĕ çав çулсем.

Эс туятăн, эс куратăн:

Пĕр тĕллев — Мускав — вĕсен.

 

Ялкăшать Мускавăн çулĕ,

Ĕмĕт магистралĕ пек,

Тинĕссен хум-шывĕ урла,

Атăл-Дон каналĕпе.

 

Хĕвелпе вăл чĕнтĕрленнĕн

Туртăнать таçтан-таçтан:

Кăнтăртан та, çурçĕртен те,

Анăçран та тухăçран.

 

Эх, çулсем, çулсем çулсемĕр,

Çут хĕвел хĕлхемесем!

Сирĕнте — çĕршыв илемĕ,

Çут тĕнче илемĕсем.

 

Пур енчен эсир тапрантăр,

Пур енчен — Мускав таран:

Ханойран та, Прагăран та,

Софирен, Будапештран...

 

Пур енчен килет нумаййăн

Халăх ырă шухăшпа, —

Караппа, самолетпа-и,

Е, ман пек ав, пуйăспа.

 

Вĕçĕмсĕр çулсем-йĕрсемĕр,

Эпир çуттăн çиçнипе

Сарăлать çĕршыв илемĕ

Халĕ пĕтĕм тĕнчипе.

 

Кремль çăлтăрĕ пит çӳллĕ,

Эс, юлташ, куран хăвах:

Туртăнать этемлĕх çулĕ

Аслă, чаплă Мускава.

 

Çавăнпа паян калаççĕ

Халăхсем пĕр ыр сăмах:

Пур çулсем илсе пыраççĕ

Çутă коммунизма!

Çавăн пекех пăхăр

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: