Çуй

Сăвар Эртиван | Сăвă | 1977 | 1 784


Шавлать хаяр тĕнче,

леш вĕçĕнче,

ку вĕçĕнче шавлать,

йăшăлтатать,

чашăлтатать,

кашлать те патлатать.

Тĕттĕм.

Сасартăк тӳпене çурса

вут-хĕлхем сирпĕнет.

Шартарнă куçăм куриччен

çиçĕм çутнă тĕнче

лаштах ишĕлет –

аслати çĕмĕрет.

 

Тĕттĕм.

Яр-р уçăлчĕ тĕнче чаршавĕ –

сăрт-ту, вăрман тухать ума,

мăн чулсене çавăрттарса

хумсем

кумаççĕ,

хысак çинчен сике-сике

авăрсене чăмаççĕ.

Çĕр чĕтретсе те кĕрлесе

хуса çитрĕ çутта

пĕр хĕрхенӳсĕр аслати.

Çиçĕм çутнă тĕнче

каллех

арканчĕ,

хура сĕме

путланчĕ.

 

Тĕттĕм.

Куçа шартарчĕ

çиçĕм.

Шур тĕтре

хуралса, хуралса пычĕ те

ман умра

хаяр та хăрушă тĕнче

кĕрлеме пуçларĕ.

 

Çак тавра

хаклă сасă илтетĕп,

çывăх сасă илтетĕп.

Ах, ытла та хăюсăр вăл,

имшер те йăлăнчăк

çав сасă:

 

«Эй, вут амăшĕ,

эсĕ çырлах, эсĕ каçар, эсĕ хĕрхен.

Сан хăватна пăхăнса

чĕркуçленетпĕр эпир,

сана асăнса

пиçнĕ ашпа витĕнетпĕр эпир,

эй, вут амăшĕ,

каçар пире.

Паян кун пулсан та,

ыран кун пулсан та

ан пăрах пире, хĕрхен пире.

Хырăмсем выçсан çулăмна пар,

ал-ура шăнсан ăшшуна пар,

каç сĕмне сирме çуттуна пар,

тăшмана çĕнме хăватна пар.

Паян кун пулсан та,

ыран кун пулсан та

ан сӳн, ан пăрах пире,

хĕрхен пире,

вут амăшĕ».

 

Шар-р! кĕрлерĕ

çӳлте,

çут тĕнче

ялт-ялт илчĕ те сиксе

каллех

çухалчĕ.

Тĕттĕм.

Аслатийĕ кăна

кăлтăр-кăлтăртатса

малалла кустарчĕ.

 

Тĕттĕм.

Сĕм-тĕттĕм.

ĕмĕрсен çумăрĕ

ĕнтĕркет,

çĕр туртăмне пăхăнса

шăм-шака ислетет.

Тӳпери сасăсем,

ăçта эсир,

ăçта çухалтăр?

Çутал, тĕнче.

Çутал!

 

Ял-л!

ялтăрчĕ тĕнче шăналăкĕ,

яр-р уçăнчĕ хура чаршав.

Чарăнман-ха

шав.

Леш вĕçĕнче те,

ку вĕçĕнче

чанклатать

Утсем пĕр кĕçенсе

чун сăрличчен

тулхăраççĕ,

çынсем

урса харлатаççĕ,

Аттила йĕкĕчĕсем

Рим тусанне

çăта-çăта

уххисене

карăнтараççĕ,

Европăна

çуй кăтартаççĕ.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: