«Тĕнче хупланчĕ шур юрпа...»

Тĕнче хупланчĕ шур юрпа,

Мăрьесенче сив çил улать,

Çанталăк хушнă вăхăтра

Ноябрь вĕçленсе пырать.

Ноябрь вĕçĕ — хĕл пекех,

Кĕр уйăхне ас илтермест.

Ман кантăка халь Юрпике

Тĕрлет ялан, кун сиктермест.

Хĕвелĕ ялкăшса пăхсан

Çунать шур юр вут-хĕм пекех.

Вĕçет çӳлте, ав, шур тусан

Кăшт сивĕ çилĕ вĕрнипех.

Ноябрь юрĕ кăпăшка,

Вăл пит илемлĕ те ачаш.

Пăхсам, туртать халь çунашка

Урам тулли ача-пăча.

Çĕнĕ комментари хуш