Пăлхар патши


Пычĕ тет пĕри пăхма

Авалхи хула тĕлне.

Пуç шăмми тухать ума

Сирнĕ майăн ун кĕлне.

 

Ылтăн-кĕмĕл япала

Тупманран кӳреннипе

Тапрĕ ячĕ малалла

Хай шăмма вăл урипе.

 

Кăлай пек леш хайхискер

Кусрĕ кайрĕ тет чылай.

Сас парать тет чип-чипер

Чарăнса ĕлкĕрнĕ май:

 

-- Тимлĕрех пăхса утсам,

Ыраттартăн ĕнсене.

Çын шăмми-çке эп, ачам,

Тен, тăсатăн несĕлне?

 

Тав Турра та Пӳлĕхçе:

Пиллĕх панăччĕ авал.

Патшара хам тивĕçе

Пытăм эп тытса кал-кал.

 

Çĕрĕм-шывăм тем тери

Сарăлса выртатчĕ ман.

Ют патша та хăш-пĕри

Пуç таймасăр пурăнман.

 

Паттăрччĕ ман çарăмсем,

Чыс кӳретчĕç патшана.

Арăслан пекех вĕсем

Çĕнтеретчĕç тăшмана.

 

Эпĕ хушнă сăмаха

Хирĕçсе-туса тăман,

Пĕр каварлă çич йăха

Çĕнеймен хурах тăшман.

 

Сутуçăсем çурçĕртен,

Кăнтăртан та анăçран —

Пухăнатчĕç ют çĕртен,

Татăлман пуç хуларан.

 

Мĕн тавар та кам тавраш

Çукчĕ пулĕ пасарта!

Тӳрĕ кăмăллă, йăваш

Калаçатчĕç Пăлхарта.

 

Пирĕн пуç хуламăра

Пурте хисеплетчĕçĕ,

Ахаль мар-тăр таврара

Аслă хула тетчĕçĕ.

 

Чапăм ӳснĕ майĕпе

Хам пуçларăм иртĕхме.

Ĕмĕт тытрăм кӳршĕпе

Çапăçса çĕрне илме.

 

Шухăшламан тапхăрта

Çитрĕ вилĕм-ватлăхăм.

Ӳтĕм çĕрчĕ хăвăртах,

Пĕтрĕ ман сăваплăхăм.

 

Ӳтĕм çеç мар, нимĕн те

Юлаймарĕ мулăмран.

Пуç хулам ларас тĕлте

Чул та шăмă çеç куран.

 

Халь мĕнпур иртен-çӳрен

Урипе тапать мана.

Авалхи еткерĕмрен

Юлнă-мĕн халап кăна.

 

Эс, тăванăм, сывă чух

Ан мухтан тивлетӳпе.

Тыт хăвна сăпайлă, чух,

Ырлăх кӳрĕ çӳл тупе.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: