Электронлă вулавăш

Аннеçĕм,

сан куллуна вĕреннĕ хыççăн

çак тĕнчере

çитмĕл те çичĕ тĕрлĕ кулă куртăм эп,

çитмĕл çиччĕшне те

сан куллупа танлаштараймарăм эп.

Йĕлпĕрсе кулнине куртăм эп,

ирĕлсе кулнине куртăм эп,

мăн кăмăлланса кулнине куртăм эп,

йăхлатса кулнине куртăм эп,

хыçăмра кулнине куртăм эп

куçăм умĕнче кулнине куртăм эп.

Сан куллуна аса илсессĕнех

çав кулăсем

хĕвелтен таракан каç сĕмĕ пек

çухалчĕç.

 

Аннеçĕм, эсĕ вĕрентнĕ кулă мана

туссем тупма пулăшрĕ,

йывăр самантсенче

ыттисене ăшăтма пулăшрĕ,

ĕмĕтсем май туртăнма пулăшрĕ.

Ӳлĕмрен

сан куллупа çуталаймăп эпĕ,

иксĕмĕре ĕмĕр-ĕмĕре

тупăк витĕнкĕçĕ уйăрать,

иксĕмĕр пĕр-пĕрне

икĕ тĕнче хушшинче

ĕмĕр-ĕмĕре çухатрăмăр.

 

Анчах та санăн куллу

тӳперен хĕвел пулса пăхать,

манăн çан-çурăма

кунсерен ăшăтать.

 

Çĕрлехи самантсенче çеç

çитмĕл çичĕ тĕрлĕ кулă тапăнать,

йĕлпĕрӳ-кĕвĕçӳ,

йăхлату-ыраттару кулли сырăнать.

Çулталăкра вăтамран

çĕр те, кун та пĕр тан,

пурнăçра та çаплах-ши,

анненни пек ырă кулă та,

хура çĕр пек йăх-ях кулă та

пĕр танах-ши?

 

Май çук çав,

чĕртĕттĕм хамăн чĕрене,

çакăттăм кăларса

каçхи хунар пек,

юпаран.

Тен, кăштах та пулсан

каç сĕмлĕхне сирме пулăшăттăм,

май çук çав…

Аннеçĕм,

тайăм пуç куллушăн,

тавтапуç.

 

12.06.1977.

Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —

Хаклав:

Шухăшĕ: --...вăйсăр...мухтамаллах   мар...вăйлă
Чĕлхе илемлĕхĕ: --...илемсĕр...чаплах   мар...илемлĕ
Содержанийĕ: --...ăшах...вăтам...тарăн