Электронлă вулавăш

Çĕршыва ир-ирех таврăнатăп,

Е хĕвел анас чух таврăнатăп.

Савăнса, шăхăрса, таврăнатăп,

Хурланса, кулянса таврăнатăп, —

Урал тăвĕ умра куç куран талккишпе,

Тĕксĕм хĕрлĕ — каç-каç, сенкер çутă — ирпе.

Шутсăр тунсăх пусать хĕвел аннă чухне,

Шутсăр самăл тапать ман чĕре ирхине.

Мĕн тери чăтăм-тӳсĕмлĕ шăплăх тăрать,

Епле чаплă мăнаçлăх мана йыхăрать!

Эп куратăп çиçсе ялтăран Урала,

Асилетĕп пин тĕрĕллĕ тастамала.

Тĕрĕре — халăх чунĕ, хавасĕ, юрри.

Тĕрĕре — ун хавалĕ, хури те шурри.

Курăр унăн вут-хĕмлĕ кашни эрешне,

Çырса хунă унта ман çĕршыв кун-çулне.

Ак хĕрли — ку вăл паттăрăн юнĕ çиçет,

Ак хури — ку асаплă юрра пăлтерет.

Сенкерри йыхăрать куллен-кун çутталла,

Кĕренни, ялав пек, шав чĕнет малалла.

Писевви — тин çеç пиçнĕ пылак çырла пек,

Кăвакки илĕртет шыв-шурсен юррипе,

Ав, тепри Алтăр-çăлтăррăн çуттăн çунать —

Сарă тĕс, пушкăрт пылĕ пек, йăптăртатать...

Эп тăратăп паян тăван çĕрĕм çинче,

Ман умра — шутсăр ирĕкпĕ аслă тĕнче.

Çут хĕлхем кăларать манăн ватă Урал,

Асамат пек çиçет ĕмĕрхи тастамал¹.

Сăрт-ту шывĕ нихçан та пăтранчăк пулман,

Тастамал тĕррине те тусан хуплайман.

Тем пулсан та ман халăхăм хăйĕн чысне

Çирĕп тытнă ялан, укермен ĕмĕрне.

Миçе ĕмĕр тата шурăм пуç килеспе

Çын киленĕ мăнаçлă хитре тĕрĕпе!

Пĕчĕк çеç эреш пулăттăм çав тĕрĕре,

Телейли пулас çукчĕ манран тĕнчере.

Равиль Бикбаев, Пушкăртстан халăх поэчĕ