Ял-йыш шутне суса çӳренĕ май...


Ял-йыш шутне суса çӳренĕ май

вĕрлĕк карта умне çитсе тăратăп.

Вĕлтрен аниллĕ кил карти, ай-яй, –

ӳпне пӳрте кĕрсе тухма хăратăп.

 

«Пурнаççĕ-ши, сывлаççĕ-ши кунта,

тен, мăрьерен тухма пăрахнă тĕтĕм?

Илтменччĕ-ха хыпар ку яхăнта» –

çапла шухăшласа шала эп кĕтĕм.

 

– Кĕме юрать-ши, пур-и кил хуçи?

– Вилмен-ха, ывăлăм, илсе кайма леш манчĕ, –

хуллен сас пачĕ те кăмакаçи,

кăштăртатса унтан пĕр карчăк анчĕ.

 

Эй, ватăлăх, мана та хуçăн-ши,

çаплах пĕкĕрĕнсе ларап-ши эп те?

Ваттийĕ, яшĕ – шутланатпăр çын,

тепле пулсан та, пурнасахчĕ тетпĕр.

 

– Пĕр пӳрт, пĕр çын тесе çырар эппин.

Сахал, сахал пуянлăхĕ ку килĕн…

Сисеп, шывланчĕ куçĕ кинемин,

– Йывăçсене, тен, ывлăм, шута илĕн?

 

Чӳречерен пăхтарчĕ урама,

пӳртĕнченех вăл пулчĕ кăтартасшăн.

– Куратăн-и кашлать ват хурама,

пĕрлешнĕ çул лартса хăварчĕ ашшĕ.

 

Йăмрисене те лартнăччĕ вăлах,

ик çул кил йышĕ хушăннăччĕ харăс.

яш каччă турăм та ик ывăла,

вĕсем те, ашшĕ те яланлăх кайрĕç.

 

– Атя-ха, – чĕнчĕ кинеми тула,

утатăп, – вăл мĕн каласса пĕлесшĕн –

Ак çак пилеш. Çырлийĕ те пулать

вăл ашшĕн мар, ывăлăмсен пилешĕ.

 

Куратăп, кăпкалатнă тавралла,

туратсене такам иртсе сайратнă,

паян ирпе шăварнă пулмалла…

Илтетĕп чĕтренӳллĕ сас, – Çыратни?

 

Шан, кинемей, чухлатăп ват чуна,

йывăçусен хакне те пĕлтĕм лайăх,

эппин, пĕле-тăркач çакна,

çырма хушман тесе епле калайăп!

– Халех çыратăп, астуман кăна,

«Пилеш пулаканни» тесех çыратăп.

Сыв пуллашса тухсассăн пĕр кана

те аташатăп, те чăнах куратăп,

йăнк-йăнк юртать пек хурама пĕкки.

Кĕçĕн çынпа килет çăка арчийĕ.

Пилеш йӳнчĕкĕнчен сикет сăпки.

Кĕрекере ик кинĕ, виç арçынĕ.

 

Самант!

Вăл ку та пĕтрĕ тек.

Асамлă сĕртĕнӳн иртмен-ши çулĕ?

Йывăçĕсен мехелĕ пур та пек,

шухăшласан, вĕсен те иртнĕ пулĕ.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: