Хунькассинчен таврăнни


Хĕл илемĕ çурхи кунсенче

Анлăрах, савăкрах пур енче.

Тӳпе те кăвакрах тӳпере

Хĕвел те ăшăрах сивĕре.

 

Çуркунне... Çурхи сивĕ кунра

Арăмпа эпĕ пултăм çулра.

Çирккаси ялĕнчен Явăша

Утса тухрăмăр пит тăрмăша.

Çуна çулĕ пĕтмен Чăвашра.

Çуна çулĕн хисеп — лашара.

Çирккасcи ялĕнче вăл чунсем

Çул хываççĕ çитсен хĕл кунсем.

Ак халь те çуна çулĕ пире

Илсе тухрĕ ялтан çут хире.

Юрлă тинĕс иленчĕ куçа...

Шухăшсем пырса кĕчĕç пуçа:

— Юрлă тинĕс выртать çĕр çинче,

Ялтăрать вăл Хĕвел айĕнче.

Пин хут пин ахах юр пĕрчисем

Хĕм сапаççĕ куçа пăхнăçем, —

Терĕм эпĕ уçса çăвара.

Арăм илтрĕ...

Сивлер. «Сăвăра

Çыр-ха эс ман çинчен виç сăмах

Вуласа киленме пĕрмаях».

Хирĕç чĕнтĕм:

— Итле, сан çинчен

Ман чĕре сăвăлать кунсерен.

Сăмахсем ялтăраççĕ куçпа,

Туйăмсем палăраççĕ каçпа.

Пйрĕн пурнăç, вăл сăвă юххи:

Эс те эп — ирĕк пурнăç çыххи,

Ачасем — пурнăçри çут тĕллев

Иксĕлми юрату — ыр телей.

Çак сукмак, çак Тĕнче, çак самант

Санпала, манпала калаçать.

Ак утатпăр эпир уйпала

Çаврăнса пăхнă май каялла.

Хыçала ура йĕрĕ юлать,

Асăмра çак самант çеç пулать:

Юрлă тинĕс выртни Çĕр çинче

Ялтăрса çут Хĕвел айĕнче.

Пин хут пин ахах юр пĕрчисем

Хĕм сапса куçсенчен пăхнисем.

 

Çирккасси — Явăш — Етĕрне

12.03.1999.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: