Ваттисен асăрхавĕсем

Петĕр Ялгир | Шӳтлĕ сăвă | 573


Чипер хĕр кĕпи çумне

Çыпçăннă сап-сарă çип.

— Упăшки, — тет, Укçине, —

Пулĕ унăн сарă çын.

 

Уçă кантăк умĕнче

Аля алшăлли тĕрлет.

Çерçи кĕчĕ вăрр! вĕçсе.

Ун каччи çапла килет.

 

Апата чĕнсен Ваçук

Ларчĕ сĕтел кĕтесне.

— Авланаймăн çичĕ çул, —

Терĕ Вера пиччĕшне.

 

Куçкĕски çине пăхать

Пилĕк хĕр пĕр харăсах.

— Вăрçса кайăр, — тет Улька, —

Эсĕр пĕр качча савса.

 

Кĕпе-йĕм çăвать Наççа,

Шывне питĕ тăккалать.

— Хыт ан сирпĕт, — тет Ваççа, —

Мăшăру ĕçкĕç пулать.

 

Апат çисен Хветура

Алпа шăлчĕ сĕтеле.

— Кукша пулĕ, ах-турах,

Упăшку сан, — тет Илле.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: