Упрар тăван чĕлхемĕре, упрар!


Вырăспала вырăсла,

Тутарпала тутарла

Пултаратăп калаçма,

Яр уçатăп чунăма

Чĕлхем пăртак такăнсан,

Кăштах карта лармасан

Мана хатĕр пулăшма

Мана хатĕр ал пама

Вырăс тусăм вырăсла,

Тутар тусăм тутарла...

 

* * *

Эп илтетĕп çаплах Хусанкай сассине,

Вăл тăван чĕлхеме пуç тайма чĕннине.

 

* * *

Митта Ваçлейĕн юррине,

Вăл халăха ыр суннине.

Тăван чĕлхешĕн çуннине

Эпир манмастпăр ĕмĕрне!

 

* * *

Туятăп эп Ухсайра

Тăван чĕлхемĕр хăватне.

Янравлă сăвă-юрăра

Эпир яман чăваш ятне.

 

* * *

Юрий Сементере

Тус-тăванăм Сементер, —

Чĕлхемĕршĕн пĕрлешер!

 

* * *

Аристарх Дмитриева

Эс çĕклетĕн тăван чĕлхене

Çут хĕвеллĕ тĕнче тӳпине.

 

* * *

Петĕр Эйзина

Санра чăвашлăх вăйлине,

Санра чĕлхемĕр илемне

Туйса тăратăп яланах —

Тавах сана, чунтан тавах!

 

* * *

Хуначи Юмарта

Юмарт, ăнлантăм эп сана —

Ал патăн, тусăм, эс мана.

Çаплах Митташăн сас палар,

Чĕлхемĕре пĕрлех упрар!

 

* * *

Любовь Фёдоровăна

Хĕрӳ чĕреллĕ çамрăксем,

Тăван чĕлхемĕр ăстисем,

Вăй-хал сунатăп эп сире —

Ыр ятăр пытăр ĕмĕре!

 

* * *

Юрий Артемьева

Ăс-хал пиллетĕн кашнине,

Тăван чĕлхешĕн кĕрешен.

Пĕрле тăрсассăн ĕç умне

Ялан хастар пулма хистен.

 

* * *

Тăванăмсем, хастар пулар,

Çунат çумне çунат хушар,

Çут çăлтăрла çунса тăрар,

Тăван чĕлхешĕн сас парар!

 

* * *

В.Г. Егоров профессора

Эс çывăх, ырă çын пулса,

Çунатлă ăс, вăй-хал пухса

Пире вĕрентрĕн хаклама

Тăван чĕлхемĕр хăватне,

Тăван чĕлхемĕр илемне!

 

* * *

Иван Ахрата

Чăваш сăвви-юррине,

Атте-аннемĕр чĕлхине

Пуçа таяр, хисеплер,

Çӳлтен çӳле шав çĕклер!

 

* * *

Тутарстанăм, сана асăнсан

Куç умне тухать мар-и Хусан.

Чăвашла передача унтан

Илтсенех савăнатăп чунтан.

 

* * *

Михаил Ставские

Ялан çапла пĕрле пулар,

Тăван чĕлхемĕре упрар!..

 

* * *

Чăваш чĕлхи, тăван чĕлхем,

Эс çав тери сăпай, чипер.

Çунатлă çул сана пиллем,

Çитес çĕре пĕрлех çитер...

 

* * *

Тавах, тăван чĕлхе, сана,

Тавах сана упракана —

Вăл маншăн çывăх тус-тăван,

Унпа çула тухма аван.

 

* * *

Тăван чĕлхем, илемӳпе

Эс паллă халĕ тĕнчипех.

Чипер, хитре эс Нарспи пек,

Эс çирĕп хурçă Çеçпĕл пек.

 

* * *

Манас марччĕ тăван ĕмĕрне

Атте-аннемĕр пире суннине,

Пуç таяр-ха чăваш чĕлхине,

Пуç таяр-ха çĕр пин юррине.

 

* * *

Асран кайми ман тус-юлташ

Тăванăм, Валентин Урташ!

Çук, эс вилмен — юрру пуртан,

Чĕлхемĕре юратнăран.

 

* * *

Эс — ман телей, эс — ман илем,

Ытарайми тăван чĕлхем!

 

* * *

Тăван халăх парнине —

Атте-аннемĕр чĕлхине,

Чăваш çĕр пин юррине,

Чăваш çер пин тĕррине,

Ан мансамăр, çамрăксем,

Ан мансамăр, ачамсем,

Ан мансамăр, мăнуксем,

Ан мансамăр, тăвансем.

 

* * *

Петĕр Осипова

Чунтанах юратрăн, хисеплерĕн,

Хамăрах тăван чĕлхемĕре,

Чăваш ятне, чысне çĕклерĕн,

Çăлтăру сан çӳллĕ тӳпере.

 

* * *

Айхине

Асилетĕп çаплах Айхие,

Çеçпĕл сăнлă чăваш поэтне,

Вăл çĕклерĕ Европа шайне

Тăван халăх сăвви-юррине.

 

* * *

А.К. Еремеева-Миттана

Ялан асăмра эс вĕрентнĕ кунсем —

Тавах уншăн сана, тавах чун-чĕререн.

Эс чăваш чĕлхине, сăввине-юррине

Юратса пурăнма тивĕçтертĕн пире.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: