Электронлă вулавăш

Çеçпĕл Мишши 75 çул тултарнă ятпа

Мишша пиччеçĕм,

Çеçпĕл.

Чунра ман лăпкă мар,

чунра халь вут-кăвар.

Вăл мĕншĕн çуннине

эс çеç пĕл.

 

Вĕрентекенĕм,

çич шитлĕ анунтан –

хулпуççуна тӳрлетрĕн те –

пĕлĕтсене тĕрентĕн эс,

сухапуçа касса лартса

çерем çĕтсе çӳрерĕн эс,

поэзи уй-хирне

çĕн вăрлăх акрăн эс,

вĕрентекенĕм.

Эс уçнă çереме

паян кунччен акса тăратпăр,

тырри-пулли пулса çитсен

выратпăр, сăвăратпăр,

вĕрентекенĕм.

 

Сухаçисем-мĕнсем нумайăн та,

ятран çĕр çукранах-ши –

чылай чухне

тăртаннă çĕр питнех таптатпăр,

пуш пучаха

тутти картне лартатпăр.

Çурасчĕ вут,

çуласчĕ утă, пĕреххут –

эпир халь ытларах

туя васкатпăр.

 

Мишша пиччеçĕм,

Çеçпĕл.

Чунра ман лăпкă мар,

чунра халь

вут-кăвар.

Вăл мĕншĕн çуннине

эс çеç пĕл.

 

Поэзи тĕнчинче

çĕр-çĕр уçман çерем.

Сан кассуна мала тăсса

эп вĕсенчен пĕрне

уçам-и?

 

Канаш хăна килĕ. 15.11.1974.

Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —

Хаклав:

Шухăшĕ: --...вăйсăр...мухтамаллах   мар...вăйлă
Чĕлхе илемлĕхĕ: --...илемсĕр...чаплах   мар...илемлĕ
Содержанийĕ: --...ăшах...вăтам...тарăн