Электронлă вулавăш

Ман парăмсем, пурне те учета илсен, çапла пулас ĕнтĕ памалли:

1. Атте патĕнче, атте лартнă пӳртре, 30 çул пурăннишĕн кашни çул хваттер укçи, уйăхне пĕрер тенкĕ çинчен шутласа, пурĕ аттене памалли — 360 тенкĕ;

2. Тум-тир, çанçурăм йĕпенесрен йĕпе-сапара, çил-тăманра атте лартнă лупасайне кĕре-кĕре тăнăшăн, хваттер укçи пекле ĕнтĕ, аттене — 30 т.;

3. Атте лашипе хăш-хăш чух ларса çӳренĕшĕн, ун лашипе суха тунăшăн, сӳре сӳренĕшĕн, хăй лашипе эпĕ аттене çĕр ĕçлесе панăшăн, авлансан атте лашипе эпĕ чиркĕве венчете кайнăшăн; атте пурттипе вут-шанкă татнăшăн, атте шĕшлипе çăпата хунăшăн атте туса çакнă çекĕлтен çаклатса кантра, пăяв-шыв явнăшăн тата ыттишĕн те пĕрле шутласа пурĕ — 200 т.;

4. Эп салтака тухса кайнă чух сăра ĕçнĕшĕн, мана ун чухне атте станцă çулĕпе çурма çула ăсатнишĕн пурĕ, — 10 т.;

5. Анне мана тăхăр уйăх хăй хваттерĕнче усранăшăн; мана çуратса, ĕмĕртсе, пăхса сăпкара сиктерсе анне маншăн чăрманнăшăн; мана чăмлак чăмласа ача чухне çитернĕшĕн аннене ман памалла пурĕ — 50 т.;

6. Хăнкăла, пăрçа, пыйтă çыртнипе, кĕçĕ кĕçĕтнипе сăпкара чухне макăрса аннене чăмантарнăшăн; анне ман çи-пуçа пăхнăшăн, анне мана çăкăр-тăвар, апат-çимĕç пĕçерсе панăшăн тата ыттишĕн аннене — 50 т.;

7. Р.S. Атте мана сăпка туса панăшăн аттене — 5 т.;

8. Шăри-шăри çухăрса, шик-шик шăхăрса, ача чухне кӳршĕ-арша, ял-йыша канăç паманшăн, вăтăра çитиччен ялта, уйра-хирте вăрманта ял-йыш çӳренĕ çулпа утса-туса çӳренĕшĕн ял-йыш хывнă кĕперпе каçа-каçа çӳренĕшĕн хамăр ял-йыша ман памалла — 72 т.

Ман ĕнтĕ парăм памалли çак сакăр статьяпа мĕн-пурĕ çич çĕр çитмĕл çичĕ (777) тенкĕ; эпĕ çанталăкра 30 çул хушши пурăнса пулнă парăмсем, индивидуальнăй пурнăçпа пурăнса пулнă парăмсем ĕнтĕ вăл парăмсем.

Халь ĕнтĕ эп колхоза кĕнĕ те, малашне ман пурнăç та зажиточнăй пулать те-ха вăл — çав асăннă парăмсене пятилеткăра пара-пара татапах ĕнтĕ, трудодень туса. Пятилетка ĕçпе хăвăртрах тума тăрăшнипе эпĕ те вăл парăма хăвăртрах татăп-и, тен-ха.