Хĕвĕшӳ

Геннадий Юмарт | Сăвă | 626


Вĕçсĕр-хĕрсĕр хĕвĕшетпĕр,

Пуршăн-çукшăн кĕвĕçетпĕр.

Ним тăрлавсăр тиркешетпĕр,

Ним сăлтавсăр тĕркĕшетпĕр.

Ыр тумашкăн ӳркенетпĕр,

Чапшăн, мулшăн хĕртĕнетпĕр.

Ырлăхра чух иртĕнетпĕр,

Хурлăхра чух ӳкĕнетпĕр.

 

Мĕн тери пирте айванлăх,

Çавăнпа йăшать тăванлăх.

Мĕн тери пирте наянлăх!

Çилпеле вĕçет пуянлăх,

Ашкăнать пирте куштанлăх,

Çураçтарĕ çынлăх, танлăх.

Тăрăшатпăр та паянлăх —

Çухалать пин хут яланлăх.

 

Эй, этем! Тĕнче илемĕ

Саншăн тепĕр хут килеймĕ.

Мул çитеймĕ туянмашкăн,

Ырă пул эппин, ан ашкăн.

Пурăн пурте савăнмалăх,

Ăшшăн-ăшшăн асăнмалăх.

Тупăн чăн телей, тăванăм,

Пурнăçпа маттур йăпанăн.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ:

Шухăшсем