Хурăнсем çаплах кашлаççĕ...

Эсĕ урăх йĕкĕте юратрăн.

Эп — сана юратрăм чĕререн.

Виçсĕмĕршĕн виçĕ хурăн лартрăм

Эс ялан иртсе çӳрен çĕре.

«Эп сана нихçан та манмăп», — терĕм.

«Курăпăр-ха», — терĕн йăл кулса.

Миçе çул ак, чиперккем, чиперĕм,

Калаçмастпăр ĕнтĕ тĕл пулса.

Манăн пуйăс аякка васкарĕ —

Юлчĕ виçĕ хурăн шавласа.

Кусрĕ, кусрĕ пурăнăç кăшкарĕ

Ĕмĕр çиппине çăмхаласа.

Пĕр хыпар та сан патна ямарăм.

Çӳремерĕм те пырса-килсе.

«Тухса кайрĕ те хайхи, мăнтарăн,

Манчĕ», — тетĕн пуль, аса илсен.

Хурăнсем çаплах кашлаççĕ, теççĕ.

Виçĕ хурăн — виççĕш те чĕрех.

Йывăçсем улталама пĕлмеççĕ,

Ыйтăр — калĕç: эсĕ чĕререх.

Çĕнĕ комментари хуш