[Ĕлĕк]

Илле Тăхти | Сăвă | 1937 | 1 798


Хапхаран та кĕтĕм — тайăлтăм,

Алăкран та кĕтĕм — тайăлтăм,

Пуян çын кăмăль çемĕçмерĕ,

Пуçăма тайни килĕшмерĕ...

 

Ники-ники хут купăс —

Пуян çынсем патĕнче;

Тăрăс-тăрăс сикни те —

Куштан этем килĕнче...

 

Мăрăк-мăрăк кушакки,

Мекек-мекек качаки,

Шăри-шари выç ачи —

Пурте мĕскĕн патĕнче...

 

Ана-çаран — тикĕсси,

Тыр-пул тăпри — мымалли,

Хăртнă-хăртнă çĕр-шывĕ —

Пурте куштан аллинче.

Ана урлă улт шырлан,

Ана тăрăх çич шырлан,

Сăртлă, чуллă тĕмеске —

Пурте мĕскĕн анисем...

Тăнлă-тăнлă этемсем —

Ăслă-хаклă куштансем

Йăпăлтиллĕ сăмахла,

Чĕлĕм ăшлĕх тапакла,

Ик-виç стакан эрехле,

Чее-суя элекле,

Карланкишĕн кастарса,

Карма çăвар — кустирек,

Пуян майлă çаптарса,

Чухăнсене хур туса,

Ялан вĕрнĕ йытă пек…

 

Пуян çынна пăхăнса,

Вăл хушнине итлесе,

Урлă-пирлĕ сăх сăхса,

Пупа турă ячĕпе,

Хăмла-ăсла сĕтекпе,

Витĕр курнан çуттипе

Сутра-йĕрте, пур çĕрте

Пуянсемпе куштансем

Чухăн çынна, йăваша,

Этем картне картмасăр,

Пĕр намăса пĕлмесĕр,

Пăркăçласа хĕстернĕ,

Мăшкăлласа пĕтернĕ...

 

Шăрттанпала чăкăта

Турам-турам тураса,

Сарă çупа сиктерсе,

Пысăк çавра çатмапа

Шĕл кăварлă вучахра

Ăшаланă çупала;

Çинĕ куштан-пуянсем

Апат-çимĕç çакнашкал.

Ĕçкĕ-çикĕ кунашкал

Ĕçсе çинĕ çавсемех.

Çăра сăра пылпала

Пылаклатса ĕçнисем;

Пăри пăтти, тул кулач

Тăраниччен çинисем —

Пурте пулнă пуянсем,

Вĕсемпеле куштансем…

Тырри-пулли пуянсен

Ампарсенче-кĕлетре;

Тӳпеленсе тӳпене

Лекес пекех выртайнă...

Юрлă çынсем, тарăхса,

Вара çапла юрланă:

«Çынсен килĕ ăш-чикки

Çап-çутă та тап-таса,

Санăн пӳртӳ пекки пур —

Вилех хуть те пăнчăхса.

Çынсен кĕрпе шӳрписем,

Сар çупала пăтăсем —

Тăраниччен сыпмалăх,

Пирĕн тăвар шӳрписем —

Виç-тăватă кашăклăх.

Асран та кайми аки-сохи,

Ĕмĕр те манми хойхи-сойхи...

Çапла пулнă çав ĕлĕк,

Асран кайми çав тĕлĕк.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: