Электронлă вулавăш

А.Воробьева асăнса

Элчел çинчен халь шухăшлас-и? —

Тин чĕрĕлнĕ çурхи тĕнче.

Хĕрсем карталанса ташлаççĕ

Слакпуç урамĕ варринче.

Виç аркăллă, хăюллă-сăслă

Кĕпи вĕсен епле хитре!

Пăхса ларасчĕ тарăн ăслăн —

Тем мурĕ йăлкăшать питре...

Ах, çаврăнаççĕ, явăнаççĕ

Нарспи инке йăмăкĕсем!

Эх, мĕншĕн, мĕншĕн эп хăна-ши! —

Чун хурланать аса илсен...

Тен, пиллĕ Слакпуçне эп килнĕ

Кăштах, кăштах кая юлса...

Вăтанчăклăн çĕн ӳсĕм кинĕ

Куçран пăхать-ха йăл кулса.

Пăхать вăл вăрттăн, шунă майăн

Чечек пек ташă картинче.

Тен, туйăнать?.. Мĕнех, нумаййăн

Йăпанакан çак çĕр çинче...

Поэт час-час телейсĕр пулнă

Пурнăçĕнче, юратура,

Вилсен анчах ăна чыс тунă —

Пĕр майлă, шăпине кура...

Епле асаплăн, тертлĕн сӳннĕ

Мухтавлă, аслă Кĕçтенттин!

Çитейрĕ унăн çутă кунĕ

Ытла кая юлса, халь тин...

Ăна савса калатпăр сăвă

Хăй ялĕнчи бюст умĕнче.

Чунра — е кӳренӳ, е тăвăл:

Пире те çăмăл мар, пичче...

Ак Воробьев Лекçей симлерĕ

Сăввин сĕтеклĕ сăмахне —

Тăп такăнĕ те вĕçлеймерĕ

Хавхаланса калассине!..

Тен, сисрĕ пуль поэтăн чунĕ

Çĕн тĕл пулу пулаймасса —

Çӳрет-ха унăн çутă кунĕ

Ялти çул тăрăх ялкăшса...

Слакпуç сывлăшĕпе сиплерĕм

Эп хам та тĕмсĕлнĕ чуна.

Тата тепре кунта чиперрĕн

Çитесчĕ ман! Тепре кăна...