Электронлă вулавăш

— Салам. Килес терĕм.

— Атя, ирт. Шăнкăравларăн та кĕтрĕм. Акă, тапочки тăхăн.

— Çу-ук, ура сывлатăр-ха, кантăр. Ахаль те кунĕпе туфлипе танклаттарса çӳретĕп. Сан урай сивĕ мар вĕт. Паркет сарнă, питĕ аван.

— Линолиума сӳсе петĕмĕр. Кавирсене те балкона шаршанласа хутăмăр, тусан пуçтарас килмест. Урайне кашни ирех шăлса каятăп, сывлама уçă.

— Пирĕн те улăштармалла, калакаланă-ха. Тульккăш ман старик çичĕ хут каламасăр нихçан та нимĕн те тумасть. Ремонт тăвасси — вăрçса каясси.

— А-ай, ман та çапларахчĕ. Пĕрисем патне кайрăмăр хăнана, теприсем патне. Пурте лайăх, таса пурăнаççĕ. Пĕри — çывăх тăванĕ, тепри — ĕçри юлташĕ. Кăçал хĕлле эпир пĕрлешни çирĕм çул тулать, хăна чĕнмелле, юбилей ирттермелле. Çынран кая курăнас мар терĕ. Сăмахне те хăй пуçларĕ, ĕçне те вăраха ямарĕ.

— Пĕччен мар ĕнтĕ.

— Пĕччен ун пек ĕçе мĕнле тăван? Шкулта пĕрле вĕреннĕ юлташĕ пур унăн. Арăмĕпе пĕрле хваттерсенче ремонт туса пурăнаççĕ. Вĕсем тума пĕлмен ĕç çук, хăвăрт, тĕплĕ ĕçлеççĕ. Тата мĕн лайăххи — эрех ĕçмеççĕ. Икĕ эрне хушшинче веçех майлаштарчĕç. Иртнĕ канмалли кун залра диванпа креслăсене улăштартăмăр.

— Ремонт тума укçи нумай каять ĕнтĕ.

— Сахал мар, нумай кайрĕ. Обойне те, паркетне те хаклисенех илтĕмĕр.

Пĕррелĕхе, ăçта кайин каймасть, хитре тăвас терĕмĕр.

— Питĕ таса пурăнатăн.

— Ремонт хыççăн та таса пулмасан... Ачасем ӳснĕ, ни кушак, ни йытă тытмастăп.

— Вĕсен шăршне эпĕ те чăтаймастăп. Кӳршĕре пĕр хĕрарăм пĕр кĕтӳ кушак усрать. Çăмламасси, çари, темиçе тĕрлĕ ăратлă кушакĕ ура тавра явкаланать вара ун патне кайсан, кухня тулли чашăк ларать урайĕнче. Сывлама йывăр, таçта та кушак çăмĕ йăваланать. Пирĕн пата каçсан унран кушак шăрши юлать хваттерте. Сывлăша тасатма балкон алăкне уçма тивет.

— Мĕн тума кирлĕ тет вара ăна çавăн чухлĕ кушак?

— Юрататăп тет, эксперимент тăватăп тет. Чаплă йышши кушак чĕппи сутса укçа тăвать пулмалла.

— Тем хăтланакан та пур пуль, лапăртатчăрах. Мана кушак та, йытă та кирлĕ мар. Ăçта ларатпăр, залра-и, кухньăра-и?

— Ăçта лартас килет, çавăнта.

— Чей бçетпĕр-и?

— Ĕçетпĕр. О-ой, сан кухньăра та питĕ хитре-е.

— Аха, хама та килĕшет. Эрех уçас-и?

— Çук, ан та уç. Пĕр сыпкăм та сыпмастăп. Чĕре уксахлать, эмел ĕçетĕп.

— Чейне, хăшне? Лавккарине-и, хам пуçтарнă курăксенчен-и?

— Хăвăнне. Ай тур-тур, кунта сан сад пахчи ешерет вĕт.

— Чăнах та, питĕ чечек юратап. Чечек ман хваттерĕпех, балконра та тăп-тулли. Хĕлĕн-çăвĕн чечек ешерет, чун савăнать.

— Аллу çăмăл пулĕ. Çеçке çурăлакан килте пурнăç ăнса пыратъ теççĕ. Ман килте чечек каймасть. Лартрăм-лартрăм, каккуй çеçке çурма, ӳсмеççĕ, пĕтеççĕ. Лартма та пăрахрăм.

— Маларах ман хамăн та каймастчĕ. Халĕ ак, пĕр пилĕк çул пулĕ, лайăх каять. Пластмасса чӳлмекре чечек тымарĕсем сывлаймасăр асапланаççĕ тенине вуларăм та, тăм чӳлмексем туянтăм. Пĕчĕккĕн-пĕчĕккĕн улăштарса пĕтертĕм. Авансран — пĕр-ик чӳлмек, шалуран — пĕр-ик чӳлмек, çур çул хушшинче мĕнпур чечеке çĕнĕ пӳрте куçартăм. Ав мĕнле хитре сарăлса лараççĕ савăннипе.

— Эсĕ хаклисене туяннă.

— Шеллемерĕм. Вĕсем час-час улăштармалли савăт мар та-ха, ялан куç умĕнче, хитре курăнччăр. Илес тĕк лайăххинех илес терĕм.

— Çĕрне лавккаран илтĕн-и?

— Ялтан илсе килтĕм. Чечек лартма шĕшкĕ айĕнчи тăпра лайăх. Вăрманĕ аякра мар та, кайрăмăр, тăватă витре тултарса килтĕмĕр. Анне чечекĕсене те ташлаттарса хăвартăм. Вĕсен çĕрне, пĕр чӳлмек юлмиччен улăштартăм, тымарĕ-тунипех сайралатрăм, çамрăклатрăм.

— Ха-аш! сывласа ячĕç пулĕ чечекĕсем.

— Ячĕç пулĕ. Авă, кур, вазăра — шăвармалли шыва эпĕ асанне парнеленĕ кĕмĕл укçа ярса çемçететĕп. Хутран-ситрен сахăрпа, тăварпа, курăк шывĕпе апатлантаратăп. Ĕçлеççĕ, ешереççĕ.

— Аха çав, чечек ĕçĕ — çеçке çурасси. Чечек те пăхнине юратать. Эсĕ курмăш пул-ха, пĕр-ик турат хуçса каяп, эс каланă пек лартса пăхап. Тен, ман килте те чечек ешерсе каять.

— Чечеке вăрламалла тет, вăрла-вăрла, хăшĕ килĕшет çавна ил. Асту, хĕрринчен, асăрханса хуç. Э-э, хуçиччен каçару йыт, тата амăшĕ ачине тепĕр çĕрте ӳсме пил патăр. Ыйт, хуç, эп курман.

— Тавах сана. Сан килте çутă, ман килте тĕксĕм.

— Çута-ат, ху çутатмасан кам çутатать?

— Эп ăнланнă тăрăх, сирĕн пурнăç йĕркеленсе кайнă пулмалла, пур енĕпе илсен те. Эп астăвасса, уйрăлас патнех çитнĕччĕ вĕт пĕр вăхăтра. Пĕр-пĕрне курманни пĕр çичĕ çул та иртрĕ пуль.

— Курнăччĕ-çке.

— Ăнсăртран, шăна пек çапăнса иртсе кайни курни мар ĕнтĕ. Калаçманни нумай пулать. Улшăннă эсĕ, урăхланнă.

— Ватăлатпăр пуль, улшăнатпăр.

— Сăнран мар, кăмăлупа урăхланнă, çемçелнĕ.

— Эпĕ нихçан та хытă кăмăллă пулман.

— Тĕрĕс ăнлан-ха, пулман. Анчах та эсĕ урăхланнă, çуталнă. Сан килте те çутă, эсĕ ху та çутă.

— Акă сахăр, акă пыл, акă варени. Чей ĕç-ха. Ма кичем эсĕ, мĕн пулчĕ?

— Ним те пулман, курас килчĕ. Каçар ĕнтĕ чăрмантарнăшăн.

— Темскер ан кала-ха. Çавăнтах ĕçлетĕн-и? Пирĕн патăртан тухса кайнăшăн ӳкĕнместĕн-и?

— Çу-ук, ĕçĕ килĕшет, ĕçтешсем те йĕркеллĕ çынсем. Чиперех. Ахаль, тем, ăш вăркать те, килем-ха терĕм.

— Чейĕ тутлă-и? Ни сахăр ямарăн, ни варенине, ни пылне тутанмастăн. Варенине хам пĕçернĕ, пылне атте юхтарать. Ан вăтан, çи.

— Эпĕ пылак питех юратмастăп. Чейĕ питĕ тутлă. Миçе курăк хутăштарнă вара кунта?

— Пиллĕк мар тăк, виççĕрен кая мар. Хамăр пуçтарнă, пахчаран та, вăрмантан та. Балконра, ялта, дачăра типĕтнисене пĕрле хутăштарса вĕтетрĕмĕр те, пĕчĕк сатин мишуксене вырнаçтарса хутăмăр. Нумай хатĕрлерĕмĕр. Килĕшрĕ пулсан, пĕр мишукне кучченеç парса яратăп.

— Ай, кучченеç тенĕрен, мансах кайнă. Пушă алпа килменччĕ-ха.

— Ним те кирлĕ мар, ан кăлар.

— Ятарласа туяннă япалана каялла илсе каймастăп ĕнтĕ. Темех мар, Çĕрпӳре кăларакан сим пыл çеç.

— А-а, ку сывлăха кирлĕ чаплă кучченеç. Çеç тесе ан кала, ку сим пыл пур енĕпе те хаклă. Пăх-ха, кĕленчи тата епле шукăль. Пултараççĕ Çĕрпӳсем. Ку кучченеçе уçмаллах. Атя, тепрер курка тултарас, чейне сим пылпа çăралатас. Эпĕ сана чей курăкĕпе пĕрле çур литр пыл парса яратăп. Ман саппас нумай, атте пылĕ, таса пыл.

— Килти пыл пасар пылĕ мар ĕнтĕ.

— Çапла çав. А-ай, тутлă-ă. Эрех уçтармарăн, ак, эрех те ĕçетпĕр.

— Ку ĕçни мар-ха.

— Хуть те мĕн кала, килен-каян хăнана пĕр черкке те пулин хаярри ярса памалла. Мĕн авалтан йăлана кĕнĕ япала.

— Хăнăхнилле, пĕр черккерен виççе çитереççĕ те, кайран вара шутлама та пăрахаççĕ. Яраççĕ те яраççĕ, ӳсĕрĕлсе кайнине те астумаççĕ.

— Аха çав. Халь хĕрарăмсем те эрехе ярăна пуçларĕç. Хăть çав енĕпе тупăшас марччĕ арçынсемпе. Пирусне паккаççĕ, эрех-сăрине лăнкăртаттараççĕ, хĕрарăм ятне яраççĕ.

— Эпир хĕр чухне пурнăç урăхларахчĕ, тасарахчĕ. Хальхи пурнăç, хальхи хутшăнусем — çынна йывăр чухне — пылчăклă, çынна çăмăл чухне — тусанлă.

— Мĕнле калама пĕлтĕн кун пек сăмаха? Чăнах çапла. Этем е пылчăк çăрать, е тусан çăтать. Сăнарлă каларăн.

— Сăнарĕсем куç умĕнчех вĕт.

— Çапла çав. Мĕншĕн питĕ тунсăхлă эсĕ? Мĕн илсе килчĕ сана ман пата? Чĕлхӳне уç, сăмахна кăлар, куратăп вĕт, тухасшăн.

— Телейсĕр эпĕ. Телей тенине пĕлместĕп.

— Мĕнле телей?

— Хĕрарăм телейĕ.

— Ун пек ан кала. Çемьеллĕ хĕрарăм — телейлĕ хĕрарăм. Мĕн чухлĕ хĕрарăм качча каяймасть, ача çуратаймасть. Упăшку пур, ачусем пур, хваттер пур, ĕç пур. Аçупа аннӳ пурăнаççĕ-и?

— Тав Турра, сывах.

— Тата мĕнле телей кирлĕ?

— Калап вĕт сана эсĕ улшăннă тесе. Пĕрле ĕçленĕ чух калаçнине астăватăп вĕт.

— Иртсе кайнă, манса кай. Ман аса илес килмест.

— Чăрмантаратăп ĕнтĕ сана.

— Ан васка, лар, ялан васкатпăр, кил тармасть.

— Кил тарма-асть. Ăшă-и унта, сивĕ-и унта, тарма-асть. Ху та унтан ниçта та тараймастăн, тарас килсен те.

— Тарас вĕçнех çитрĕн-им?

— Çу-ук. Юрату çук, телей çук, хĕрарăм телейĕ çук.

— Чирлемест пулĕ те...

— Çу-ук, вăкăр пек сывă, вăкăр пек мăран, вăкăр пек мăйракаллă.

— Урăххи тупрăн-и, мăйракаллă турăн-и?

— Çу-ук, ним калама та çук, тӳрех сĕкме хатĕр. Çавăнпа каларăм. Урăххи çук ман никам та, пулман та, пулас та çук, телей тенине курас та çук.

— Никама та юратмастăн-и?

— Кама юратас? Мĕн юратăвĕ пултăр... Кичем.

— Эпĕ телейлĕ. Эпĕ юрататăп.

— Кама?

— Ăна юрататăп.

— Упăшкуна-и? Кама?

— Ăна. Ун урлă упăшкана та теме юрать.

— Тем калатăн, ху та пĕлместĕн.

— Питĕ лайăх пĕлетĕп.

— Лешĕ-и, сан тахçанхи-и? Каласа панăччĕ-çке мана пĕррехинче.

— Каланă пуль.

— Тăна ан кăлар-ха, ан шӳтле. Калатăп вĕт эс улшăннă тесе.

— Сан питĕ пĕлес килет-и?

— Телейлĕ, юрататăп тетĕн те, пĕлес килет, кампа телей тупнине.

— Каласан — кулатăн.

— Суятăн эс, çук сан никам та.

— Пĕр енчен пăхсан — çук теме юрать, тепĕр енчен пăхсан — пур теме пулать.

— Ăçта? Кам?

— Ăçта — ĕмĕтре. Кам — савни.

— Э-эй, ĕмĕтре... Ĕмĕт ухмах вăл.

— Ĕмĕт те ăслă пулсан вара чăнахах ухмаха тухан.

— Санпа калаçма та пĕлмелле мар. Юрату-у, теле-ей... Юрату та, телей те çук.

— Маншăн — пур.

— Маншăн — çук.

— Пултарас килмест сан, çавăнпа çук. Пултарас килсен — пулать.

— Мĕнле майпа? Манран кăна килмест, юратма арçын кирлĕ.

— Туп та юрат.

— Утă капань айĕнче йĕп шыранă пек-и?

— Эпĕ утă капанĕнчи хамăн йĕппе тупнă.

— Каллех тем лапăртататăн. Çук вăл — телей, ĕненместĕп.

— Пур, эпĕ телейлĕ. Ма тарăхатăн эсĕ?

— Тарăхатăп-и? Каçар, хам та пĕлместĕп. Эсĕ телейлĕ, эпĕ телейсĕр. Манăн та телейлĕ пулас килет. Эсĕ тупнă, ман тупăнмасть.

— Ан вĕчĕрхен, сăмаха ху пуçларăн.

— Юри калатăн эс. Те куласшăн манран, ахалех килтĕм пулас. Каятăп, чăрмантарнăшăн каçару ыйтатăп. Çук ĕнтĕ вăл ман валли, канăç тени.

— Лар, ниçта та каймастăн, ямастăп. Чей ĕç.

— Эпĕ вăлтса калаçнине юратмастăп. Тен, ăнланмастăп.

— Вăлтмастăп, тĕрĕсне калатăп.

— Апла пулсан хăвна ху суятăн.

— Суятăп... Чăнах та суятăп. Çавă суя çутипе çуталса пурăнатăп.

— Туятăп-ха та суйнине, пĕлетĕп вĕт эсир мĕнле пурăннине, каласа кăтартнисене манса кайман.

— Манса кай. Пĕрре каларăм манса кай тесе, тепре калатăп. Пулнă, иртнĕ, кайнă. Япăххи те пулнă, лайăххи те пулнă. Чăтăмлă.

— Упăшка пăхмасть, ачасемпе ятлаçатпăр теттĕн те.

— Ачасем вĕсем вĕрентсе каланине юратмаççĕ, тăнласшăн мар. Упăшка тесен... Ма пăхмасть? — пăхать, хăйне майлă, мĕнле пĕлет, çавăн пек пăхать. Урăхла пăхма пĕлмест, пултараймасть вăл урăхланма. Ăнланса çитрĕм те, кӳренме пăрахрăм. Çамрăкла ăна-кăна пĕлмен, ним те пĕлмен. Халь пĕлетĕп.

— Нумай пулать çав калаçманни.

— Юрать тĕл пултăмăр. Ăçтан вăхăт тупрăн паян?

— Тем çитмест, ăш вăркать, килем-ха терĕм. Атту пĕрмай пĕр пек. Килтен — ĕçе, ĕçрен — лавккана, лавккаран — кухньăна, кухньăран — çывăрма. Пурнăç ятлă тет çак кустăрма.

— Çапла çав. Пурте çапла пурăнаççĕ.

— Пурте ма-ар. Теприсем тем тума та вăхăт тупаççĕ.

— Эс те туп, çаврăнкала.

— Çу-ук, наян эпĕ, ман вăй çук. Тен, сăлтав çук.

— Ĕçре чиперех терĕн. Килте чиперех пуль?

— Чиперех. Эс калашле — чăтăмлă.

— Апла пулсан мĕншĕн кулянатăн?

— А-ай, темскер, чун хурланса килчĕ.

— Мĕн пирки?

— Тем шутлан ĕнтĕ, те калас?

— Калама килнине кала.

— Пирĕн ĕçре пай пуçлăхĕ арçын. Çирĕп ыйтать, кăмăллă, йĕркеллĕ. Нихçан та ытлашши калаçмасть, ĕç хыççăн ялан киле васкать.

— Вара?

— Арăмĕ мĕн те пулин тăвать-ши ун? Çуркуннерен пуçласа кĕркуннеччен вăл дачăри ĕçсене пĕтĕмпех хăй тăвать. Арăмĕ помидорпа хăяр калчисене суйласа парса тăрать тет. Лартасси, шăварасси, çумласси, пуçтарасси ман ĕç тет. Хĕлĕпе, канмалли кунсенче, çемйине мунчана илсе çӳрет.

— Вăт мĕнле лайăх упăшка. Ун пекки сахал.

— Итле-ха. Мунчине хутать, шашлыкне ăшалать, какайран та, пулăран та. Вĕсене пасартан кайса илет, хăех шӳтерме лартать.

— Машина пур-тăк тем тума та ĕлкĕрет ĕнтĕ. Автобус кĕтсе тăрасси мар, лар та кай.

— Мунчара çăвăннă хыççăн тепĕр эрне валли мунча хатĕрĕсене, тарлă тумтире çуса çакса хăваратăп тет. «Арăму мĕн тăвать вара?» — тесе ыйтрăмăр та: «Канатъ, эпĕ ăна тĕрлĕ курăкран, çырларан чей вĕретсе паратăп», — тет.

— Çын тăк çын, чăн-чăн арçын. Мĕн тери юратать вăл арăмне, мĕнле упра-ать. Мĕнле телейлĕ унăн арăмĕ.

— Курнă эпир ун арăмне, пырса кайнăччĕ пĕрре. Венера Милосская мар, пирĕн пекех, вăтам.

— Телейлĕ хăрарăм. Хитре пуличчен телейлĕ пул тесе ун çинчен каланă пуль.

— Шутла-ха, отпускне ялан арăмĕн отпускĕ вăхăтĕнче илет. Кăçал Европăна каятпăр тет. «Ази тăрăх çӳресе çитет, урăх çĕре кайса курас килет», — тенĕ тет арăмĕ. Вăт упăшка! Пирĕн — каккуй унта Ази, каккуй Европа. Ман Азипе Европа — ялта, хамăр ялта, ун ялĕнче. Вăт пурнăç, пĕрисем кутне мăкăртса хăйăр çинче хĕртĕнсе выртаççĕ, тинĕсре чӳхенеççĕ. Эпĕ вара кута мăкăртса, çурăма çурмалла хуçса пахчара мĕкĕрленетĕп, тарпа çăвăнатăп. Ĕмĕрĕпех çапла. Таçта тухса кĕрес пирки, канма каяс пирки çăвара та ан уç. Мĕн каласси, иртсе кайрĕ ĕнтĕ пурнăç тени. Мускавра та пулса курман эп. Эс пулнă-и?

— Пулман. Азире те пулман, Европăра та пулман. Ман та сан пекех.

— Шутла-ха эс, помидорпа хăярне те хăех тăварлать. Банка ăшне арăмĕ тултарать тет, ыттине вара хăй тăвать.

— Пĕтĕм йывăр ĕçе хăй çине илет апла, арăмне хĕрхенет, хисеплет. Вăл сан пай пуçлăхĕ пулман пулсан пĕлес те çук ун пек арçын пуррине. Ун пекки темиçе пинрен пĕрре пуль, ĕненме те йывăр.

— Итле-ха, эсир кăмпа татса килсен кам тасатать?

— Мансăр пуçне кам тасаттăр? Нумай татса килсен ачасем пулăшаççĕ.

— Эпĕ те çĕрĕпе ларатăп ваннăра. Пилĕк нăйкать, мăй нăйлать, пуç янăрать. Ирпе тăран та, кăмпине пĕçермелле, тăварламалла, банкисене вĕретсе типĕтмелле, хупмалла...

— Хăть çырла, хăть кăмпа, хăть помидор, хăть хăяр, ĕçĕ пайтах.

— Пирĕн пай пуçлăхĕ кăмпине те хăй тасатать. Арăмĕ кăмпине пуçтарса ывăнать имĕш. Черникăпа клюквăна кайнă чух арăмне пĕрле илмест, ӳпре-пăван сăхнине чăтаймасть тет. Çырлине холодильника хуратăп тет, шăнтма. Хĕлле ăшăтса çитеретĕп тет, арăмне. Мĕнле телейлĕ хĕрарăм.

— Арăмĕ те телейлĕ, упăшки те телейлĕ. Арăмĕ — упăшки пăхнипе, упăшки — арăмне пăхнипе. Эсĕ ăна юратса пăрахман пулĕ те...

— Çу-ук, арçынни питĕ юратмалли арçын, паллах. Вăрăмскер, хырăмĕ кăнтарса тăмасть. Спорт вăййисене хутшăнать, ирпе физкультура тăвать.

— Ăçтан пĕлетĕн?

— Хăй каланинчен.

— Эс унпа калаçкалатăн-им?

— Эпир çуралнă кунсене пĕтĕм пайпа пĕрле пуçтарăнса ирттеретпĕр, çавăн чухне калаçнисене астуса калатăп.

— Эсĕ ăна хăв упăшкупа танлаштаратăн та кулянатăн, хăвна ху хĕрхенсе. Аха-и?

— Аха çав. Нимпе те пулăшмасть вĕт. Мунчана кайсан та çурăм çума ыйтас пулать. Ыйтмасăр пуçĕ тавçăрса илеймест. Вăл ман ыйтмасăр пӳрнине те вылятмасть.

— Вырăн çинче те-и?

— Вырăн çинче... Калама та намăс. Оргазм, оргазм теççĕ, икĕ ача çуратса ӳстертĕм, оргазм мĕнне пĕлместĕп.

Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —

Хаклав:

Шухăшĕ: --...вăйсăр...мухтамаллах   мар...вăйлă
Чĕлхе илемлĕхĕ: --...илемсĕр...чаплах   мар...илемлĕ
Содержанийĕ: --...ăшах...вăтам...тарăн