Спаскав Якурĕ


Çĕрĕм-шывăм сарлака

Вĕçĕ-хĕрри курăнмасть.

Савнă халăх тăрăшса

Пурнать ĕçри вăй-халпа.

 

Хĕрлĕ Чутай районне

Кĕрекен пĕчĕк ялта,

Сĕнтĕкçырми ялĕнче,

Çирĕпленнĕ хушма ят.

 

Ватă çынсем калани

Асра юлнă хăшсенче.

Сăмах пырĕ çак ялти

Спаскав Якурĕ çинчен.

 

Аттелĕх вăрçичченех

Лартнă вăл çурт çĕннине.

Çакă çурта нĕр кĕртме,

Шут тытнă сăрă илме.

 

Чулхула облаçĕнчи

Спасское салийĕнчи

Пасара çитнĕ çуран,

Килнĕ сăрă туянса.

 

Çĕнĕ çуртăн мал енне

Сăрланă капăр тĕспе.

Çурчĕ чиперленнипе

Савăннă чунĕпеле.

 

Пӳрт умĕнчи çул çине

Тухнă Якур час-часах.

«Спаскав вĕт, Спаскав, Спаскав», —

Тенĕ хĕпĕртенипе.

 

Вăт çавăнтанпа вара

Яртуш Якурне ялта

Пĕр пĕчĕк сăлтавранах

Тупса панă хушма ят.

 

Спаскав Якурĕн çемйин

Икĕ ывăл çитĕннĕ.

Асли Иван ятлăскер,

Пулнă Борис пĕчĕкскер.

 

Вăрçă пуçланичченех

Якур пурнăçĕ çапла

Татăлнă вăхăтсăрах

Пĕр илемлĕ кунхине.

 

Вунсакăр çул тултарнă

Спаскав Якур Иванĕн

Салтак кайма ят тухсан

Тухса кайнă вăл вăрçа.

 

Спаскав Якур Иванĕ

Кĕрешнĕ тăшманпала.

Пĕр тан мар çапăçура

Пуçне хунă паттăрла.

 

Вăрçă вĕçленсессĕнех

Иккĕмĕш ывăл вара

Нумаях пурăнайман.

Пачах пĕтнĕ йăх вĕсен.

 

Сĕнтĕкçырми ялĕнче,

Спаскав Якур вырăнче.

Юлман иккен нимĕн те,

Çук тек йĕрри-палли те.

 

Пурăннă чух çеç тĕнче

Илемлĕ тĕлĕнмелле.

Ĕмĕрлĕх кайсан кунтан

Таврăнмаççĕ нихăçан.

 

Халапĕ

Сĕнтĕкçырми ялĕнче Спаскав хушма ят çирĕпленнĕ. Çак хушма ят историйĕ çинчен ватă çынсем çапла каласа панă.

Пирĕн ялта Егор Ярдушкин пурăннă. Вăл Аслă Отечественнăй вăрçăчченех çĕнĕ çурт лартнă. Чулхула облаçĕнчи Спасское салине пасара çуран кайнă. Унта вăл хăйне кирлĕ сăрă туянса килнĕ те çуртăн мал енне сăрланă. Якур хăйĕн пӳрт умĕнчи çулĕ çине час-часах тухнă та çапла каланă: «Спаскав вĕт. Спаскав». Çавăнтанпа çынсем ăна Спаскав Якурĕ теме пуçланă.

Эпĕ ăна астумастăп. Спаскав Якурĕ вăрçă пуçланичченех вилнĕ тенине илтнĕ. Аслă ывăлне, Ивана, кăштах астăватăп. Иван е 1923 çулта, е 1924 çулта çуралнăскер, фронтра вилнĕ. Иккĕмĕш ывăлĕ Борис та тахçанах вилнĕ.

Спаскав Якурĕсем паянхи кун пурăнакан Васильевсемпе юнашар пурăннă пулнă. Хальхи вăхăтра, вĕсем пурăннă вырăнта, нимĕн те çук.

 

Халап çăлкуçĕ: халап ниçта та пичетленмен, ăна Сĕнтĕкçырми ялĕнче пурăнакан 75 çулхи Ядранский Геннадий Алексеевичран 2009 çулта çырса илтĕм.

Вулавçăсен шухăшĕ Вулавçăсен шухăшĕ


Admin (2009-11-12 10:10:06):

Халапĕ питĕ интереслĕ, сăввине те лайăх хайланă.

 

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: