Электронлă вулавăш

«Малашне çыру тăрăх çыхăну тытнипе çеç мар, курнăçăпăр та...» Малашне мар, паянах! Çыру тăрăх та мар, куçа-куçăн! Халех, çак минутрах каять Витали унта. Комэскаран ирĕк илет те вашлатать...

Вăл кравать çинчен сиксе тăчĕ, хыпаланса тумланчĕ. Унтан, çăвăнмалли хатĕрсене йăтса, умывальникелле чупрĕ.

Шăлне тасатса пĕтернĕччĕ енте, пит-куçне супăньлеме пуçланăччĕ, — çав самантра алăк умне Игорь çитсе тăчĕ. Хĕремесленнĕ хăй, пичĕ тăрăх тар юхать.

— Атя, — терĕ вăл, хашка-хашка, — кайрăмăр.

— Ăçта? — юлташĕ çине ăнланаймасăр пăхрĕ Витали. — Хĕр куçлама мар пулĕ те...

— Мар. Ăна тахçанах куçланă. Унран пысăкрах ĕç пур. Н. районĕнче паллă мар самолет государство чиккине пăснă. Пире хула çуле çинчен çавăрчĕç. Кайрăмăр часрах!

Кун пек чух вăрах сăмахламаççĕ, кун пек чух мĕн тумалли каламасăрах паллă.

Вĕсем, вĕçев тумĕ тăхăннăскерсем, общежитирен тухса чупма тăнăччĕ, телефон янăраса кайрĕ. Дневальнăй трубкăна васкаса тытрĕ, хăй итлени çинчен пĕлтерчĕ.

— Аслă лейтенант юлташ! Аслă лейтенант юлташ! — кăшкăрса чарчĕ вăл алăкпа хупланакан Виталие. — Сирĕнпе командир калаçасшăн.

Командир кĕскен те татса каларĕ: леш самолет халĕ С. хули патне çывхарать. Ăна дежурнăй звено йĕрлесе пырать. Анчах ку кăна çителĕксĕр. Ун çулне, тӳрĕрен тухса, пӳлес пулать. Çак ĕçе вĕсен тумалла. Ведомăйпа иккĕшен.

— Ăнлантăн-и?

— Ăнлантăм, командир юлташ!

— Халех аэродрома чупăр. Часах унта эпĕ хам та çитетĕп.

Темиçе минутран тарăн кӳлĕри шыв пек тăрă тӳпене шĕвĕр сăмсаллă та сарлака хӳреллĕ пысăках мар икĕ хурçă кайăк ярăнса çĕкленчĕ. Пĕчĕк те хаяр кайăксем. Çӳлтен çӳле хăпарчĕç, тепĕртакран вара, сенкертерех сывлăш ытамĕнче ирĕлсе, пачах курăнми пулчĕç...

Çакнашкал вăл аякра-аякра, мăн Атăлтан темиçе пин çухрăмри чикĕре. Унта тепĕр чух канмалли кунта та канăнмасть, тем териех каяс тенĕ çĕре те кайăнмасть. Йĕрки çапла, çар йĕрки. Салтакăн кирек хăçан та салтак пулмалла, ун яланах хуралта тăмалла.