Кукша пуçлă сарă хир


Уй-хир, уй-хир — йăлттам, илемлĕ,

Юмах тĕнчи пек илĕртет.

Хĕвел шевлийĕ çут хĕлхемлĕн:

«Пăхсамăр, куç ан илĕр», — тет.

 

Чăнах та, тĕлĕнтермĕш мар-и:

Чечек кавирĕ талккăшпех.

Ăçта пăхсан та — сарă, сарă,

Сар тинĕс сарăлнă пекех.

 

Хавха çĕклерĕ çеç пĕр ластăк

Сар кун çĕршывĕнчи юмах —

Чĕре кăртлатрĕ ман сасартăк:

«Мĕскершĕн савăнан, ухмах?!»

 

Куратăн, халь вăл — хир хуçийĕ,

Ăна саратнă кукша пуç.

Кула-кула юхать çĕр çийĕн...

Эс пур каласшăн: «Тавтапуç?!»

 

Шарт сикрĕм. Çуттăн, шуçăм евĕр

Тухать ӳкерчĕк куç умне:

Тыр-пул пуссийĕ вĕçсĕр-хĕрсĕр,

Кустарчĕ савăккăн хумне...

 

Унтан палт улшăнчĕ ӳкерчĕк:

Уйра — тем çӳллĕш хыт хура.

Мĕнле инкек тухатрĕ, ерчĕ —

Усал çĕнтерчĕ-ши ырра?

 

Пĕлетпĕр-ха, сăлтавĕ паллă:

Хăварнă уй-хире пушша.

Çум курăк ашкăнчĕ усаллăн,

Халь ак кукша ярать ташша...

 

Пăхма хитре-ха — куç илеймĕн,

Анчах кăшт вăхăт ирттĕр çеç —

Нимскер те юлмĕ çак илемĕн:

Вĕçтерĕ вăррине веçех.

 

Вара... Вара çак сарă юхăм

Татах та сарăлĕ инçе.

Çапса хытарĕ шелсĕр шалкăм:

Ан ӳстĕр тырă çĕр çинче!

 

Çакна кĕтетĕн-и, ентешĕм —

Мухтавлă паттăр, ял çынни?

Е çĕр халь саншăн ют тĕнче-ши,

Тем мар-и вăл «кукшаланни»?

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: