Ларатăп та шур чул çине


Аптăрать хай хаяр Супетей

Илейменшĕн Сăвар хулине...

«Шапатан тухатмăш» юрăран

 

I

Час-час килетĕп эп кунта,

Чуна туртать çап-çут Вăта.

Ларатăп та шур чул çине

Çитеп вара çулпа пине...

Путатăп эпĕ шухăша,

Çӳреп пин çул аша-аша,

Илтеп сасартăк хаш чухне

Уртан сехреллĕ сассине.

Килсе тухать хура утпа

Нӳкер хĕçпе те хĕм-вутпа.

Утап вара вăрçа тухса —

Кистен çакса, чукмар тытса.

«Тăшман таптать тăван çĕре,

Чура тăвасшăн вăл пире!

Çĕрне-шывна, ачам, сыхла,

Кăрал тытсам эс арпуçла!» —

Пиллет мана тăван анне,

Парса аттен кăвак хăртне.

 

Пиллет мана вăрман, уй-хир:

«Калла ан чак! Хурах вăл, хир!

Арçын ятне тытса чысра,

Вучах вутне куç пек упра!..»

Хиреп вара эп тăшмана,

Çĕршыв парать вăй-хал мана.

Кĕçех хурах сăрне ярать —

Чăл-пар тусать, чакать, тарать!

Каллех хĕвел хавас çиçет,

Хирте тырпул тулса пиçет...

 

...Час-час килетĕп эп кунта,

Чуна туртать çап-çут Вăта.

Ларатăп та шур чул çине —

Çитеп вара çулпа пине...

Илтеп сасартăк хăш чухне

Уртан сехреллĕ сассине.

Утап вара вăрçа тухса —

Кистен çакса, хăрта тытса...

 

II

Кунта кашни чул кăшкăрать,

Кунта кашни чул макăрать...

Улать урса вутпа çĕмрен,

Хĕвел хуралнă йĕнĕрен.

Турта çумне çыхать лере

Тăшман чечек пек сар хĕре.

Йĕри-тавра хӳхлев, ылхан,

Ялсем çинче сĕрлет çăхан...

Тухать хĕвел, тавра шăпах,

Хитрен сас пачĕ ак юпах.

Майпен сӳнеççĕ кăвайтсем,

Тетел туртаççĕ пулăçсем.

Çĕре шăварнă хĕрлĕ юн,

Çĕрне сыхланă паттăр чун —

Чечек пулса — умра çиçет,

Тăри пулса çӳлте вĕçет.

Тăратăп шухăша кайса,

Пăлхар кĕлне алра тытса.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: