Шетмĕ шывĕ хĕрринче


Симĕс-симĕс улăхра

Пăс юхать — шăрçа тăкать.

Шурăм пуçĕ тухăçра

Вăй вылять, хĕвел тухать.

 

Ялкăшса хĕвел тухать,

Шетмĕ тăрăх хĕм тăкать,

Шетмĕ тăрăх çул хывать —

Ĕнчĕ-ылтăн çул хывать.

 

Шетмĕ шывĕ тĕк тăрать,

Кĕмĕл кăкăрĕ çине

Çил анать те — кустарать

Вĕтĕ-вĕтĕ хумсене.

 

Ĕнтĕ ял та вăранать

Канлĕ, тутлă ыйхăран.

Васкаса утса анать

Çăл патне пĕр хĕр туран.

 

Чиперук, чиперук!

Кун пек хĕр те пур, те çук, —

Утти — акăш утти пек.

Пĕвĕ — Шетмĕ хăви пек.

 

Колхозра çĕр çичĕ ут.

Çăмарта пек утсемпе

Çамрăк конюх та виç хут

Анчĕ ĕнтĕ çăл патне.

 

Çамрăк хĕр те — сисетре! —

Виçĕ хут шыва анать.

Шыв юхать, хăрах витре

Тулнă ĕнтĕ — тăкăнать.

 

Каччă меллĕн шăхăрать —

Шыв ĕçеççĕ учĕсем.

Ну-и чăрсăр та вара

Каччăн харсăр куçĕсем!

 

Тутипе хăй шăхăрать,

Куçĕпе хĕре сăнать.

Тем юсать хĕр тутăра,

Хĕрелет хĕр — вăтанать.

 

Хĕрелет хĕр — пăлханать.

Юн çунать, вылять питре.

Шыв юхать, хăрах витре

Тулнă ĕнтĕ — тăкăнать...

 

Шартлатать ак калитке —

Çăл патне анать инке.

 

Хĕр йăтать витрисене:

— Тух эппин, — тет, — каçхине.

 

Чиперук, чиперук!

Кун пек хĕр те пур, те çук, —

Утти — акăш утти пек,

Пĕвĕ - Шетмĕ хăви пек.

 

Каччă меллĕн шăхăрать —

Тулхăраççĕ учĕсем.

Каччă хĕрĕ хыçĕнчен

Честь парса юлать: — Юрать!

 

Ĕнтĕ ял шавлать, йăслать.

Грузовик таçта васкать —

Улăх тăрăх ыткăнать.

 

Улăх —

Сывлăмне тăкать.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: