Кĕрхи вăрман салху сулхăнĕнче...

Вячеслав Круглов | Сăвă | 542


Кĕрхи вăрман салху сулхăнĕнче

Пулмашкăн хапăл мар пуль нимĕнле чĕрчун та.

Шăп-шăпăртах вăрман хутлăхĕнче

Шухăшăмпа пуятăп темшĕн чăн та.

 

Вĕçе-вĕçе иртеççĕ пĕлĕтсем,

Çук, пĕлĕтсем те мар тăр — ĕмĕтсем

Васкаççĕ эп курман, пĕлмен çĕре,

Мĕскер шыраç вĕсем çав ют çĕрте.

 

Кĕр сăнĕнче мĕн чухлĕ ĕлккенни!

Вăрман çаралнă, симĕсех юманлăх

Пит васкамасть хывмашкăн ĕлккине,

Хавалĕнче пурнать иккен-ха мăнлăх.

 

Санра эп несĕл сăнарне куратăп,

Тĕреклĕхӳ — ман юнăмра чупать.

Юманлăха мĕн виличчен юратăп

Пĕр кăмăллă, хавас кăна чунпа.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: