Электронлă вулавăш

Григорий Тимофеевич Алентей 1903 çулхи ака уйăхĕн 12-мĕшĕнче хальхи Вăрмар районĕнчи Кĕтеснерте чухăн хресчен кил-йышĕнче çуралнă. 1917 çулта Хусанпа Мускав хушшинчи чукун çул çинче тĕрлĕ ĕç тăвакан рабочи пулса ĕçленĕ.

1919–1920 çулсенче Хусанти педагогика курсĕнче вĕреннĕ. Ун хыççăн Чăваш комсомол обкомĕн инструкторĕ тата Çĕрпӳре РОСТА представителĕ, çав вăхăтрах уесри «Красный вестник» хаçат редакторĕ пулнă. 1921—1924 çулсенче Мускавра Хĕвелтухăçĕнчи халăхсен университетĕнче пĕлӳ илнĕ. Унтан вĕренсе тухнă хыççăн икĕ çул «Канаш» хаçат редакторĕн çумĕ пулнă.

1926 çулта учитель ĕçне куçнă. 1933 çулта вăл партин Вăрнар райкомĕн пропагандăпа агитаци пайĕн пуçлăхĕ тата районти хаçат редакторĕ пулнă. 1935 çулта ăна КПСС Çĕмĕрле райкомĕн иккĕмĕш секретарĕ пулма суйланă. 1936—1937 çулсенче вăл Парти обкомĕн пропагандăпа агитаци пайĕнче заведующи çумĕ, 1938—1959 çулсенче Канаш районĕнчи Шăхасанти Çеçпĕл Мишши ячĕллĕ вăтам шкулта истори учителĕ тата вĕренӳ пайĕн пуçлăхĕ пулса ĕçленĕ.

1974 çулта вилнĕ.