Хапăлласа кĕтсе илетпĕр

 

Ку сайтра эсир чăвашла çырнă хайлавсене тупма пултаратăр. Пур хайлава та авторĕ, çырнă çул тăрăх çăмăллăн тупма пулать. Ку архива ятарласа хатĕрленĕ — сире килĕшекен хайлавсене эсир ку сайтра та, уйрăммăн уçласа илсе те вулама пултаратăр.

 

Кĕнекесем

Хӗвел мулкачӗсемАндрей ПеттокиÇул хыççăн çулЙĕрсемĔмĕр сакки сарлака. 3-мĕш томТĕлĕнтермĕш юмахсемВăрман ачисем

Ĕмĕр вĕрен


Ватă çын каçсерен энциклопеди страницисене уçса мăнукне тĕлĕнтерчĕ:

— Асатте, эсĕ мĕншĕн ялан вулатăн? Института вĕренме кĕресшĕн-им?

— Кĕрес тетĕп-ха, ачам. Пурнăç институтне вĕренсе пĕтерес тетĕп.

— Ача чухне вĕренеймерĕн-и?

— Пĕчĕкренех, мăнукăм, хам тĕллĕн çĕр ĕçĕпе тăрмашрăм: сухаларăм, ака турăм, выртăм, пуçтартăм... Кирпĕч çапрăм, кăмака турăм, пура пураларăм, çăл чаврăм, йывăç лартрăм.

— Тата мĕн тумалла санăн?

— Вертолёт пуçтарма вĕренес тетĕп-ха, мăнукăм. Хуларан ялти çывăх тăвансем патне вĕлт кăна вĕçсе çитесчĕ манăн санпа.

Вĕренни — çутă, вĕренменни — тĕттĕм тесе ахаль каламан.

Хăрамастăп


Вăкăр килет мĕкĕрсе,

Ял урамне çĕмĕрсе.

Йăраланать. У-у, йăтмак!

Вăйне ниçта хураймасть.

 

Ан тив, вăл маттур,

Хăрамастăп эп унран:

Карта хушăкĕ ман пур,

Вăкăр тухаймасть унтан.

«Пĕчĕк пӳрт авалхи йывăçсем хыçĕнче…»


Пĕчĕк пӳрт авалхи йывăçсем хыçĕнче,

Çав пӳртрен илтĕнеççĕ ачаш сасăсем.

Пулнă йывăр çулсем, сав синкер çулсенче

Тарăн вар тĕпĕнче-мĕн пытаннă çынсем.

 

Ман умра чăнкă çыр, çăмăл мар çĕкленме.

Чăмăртатăп алла, хытарап чĕрене.

Çитеретĕп хаюлăх сире пĕлтерме:

Иртнĕ кунăн кĕвви çавăнтан илтĕнет.

 

Асăрхаççĕ куçсем умра ик мĕлкене —

Чаккапа Тайпин шухăшлă сăнĕсене.

Йывăçсем хушшинчен ак тухаççĕ вĕсем,

Мана курчĕç — пуçларĕç чупма шикленсе.

 

Кăшкăратăп, чĕнетĕп ан тарăр тесе,

Вĕсене хăтарма эп шыратăп тĕрев.

Итлемерĕç мана, пач çухалчĕç вĕсем,

Унтанпа канăç çуккă ман чун-чĕрере.

«Кунта хĕвел пайăркисем…»


Кунта хĕвел пайăркисем

Ача пекех выляççĕ.

Йĕри-тавра юханшывсем

Илемлĕн çуталаççĕ.

 

Кунта вĕри çилсем питрен

Ачашшăн çупăрлаççĕ.

Тем тухатса кĕтмен çĕртен

Чуна хумхантараççĕ.

 

Кунта шап-шурă чечексем

Юр евĕр хӳхĕм тумлă.

Кăштах çеç сывласа илсем —

Ялан эс пулăн çамрăк чунлă.

 

Кунта кашни кун шурăмпуç

Вутла çунни — асамлăх.

Хăть пурăнма халех эс куç —

Пурте параççĕ алă.

Эп ăнлантăм çĕр чăнлăхне


Çунатсем пуласчĕ манăн — шухăшлаттăм.

Пулнă вăхăт — эп вĕçеттĕмччĕ кас-кас.

Эпĕ кайăк пулаймарăм — йышăнатăп —

Пур пулин те çунатсем, мĕн-ха тăвас?

 

Таврăнтăм эп, кĕтсе илчĕ çĕр-тăванăм —

Чăнлăхне ăнлантăм. Эп калап чунтан:

Тăрăштăр йăва пирки лаштра вăрманăм!

Эп сывларăм ассăн — кайăка курсан.

Касма пулать


Лена çитсă татăкне унтан-кунтан виçкелерĕ те тӳрех хачăпа касма тытăнчĕ. Кĕçех уяв çитет, васкамалла унăн. Хĕр ача хăй çĕленĕ кĕпене хăвăрт кăна тăхăнчĕ те тĕкĕр умне пычĕ.

— Ай-ай! Мĕн ку? Хăрах çанни тăвăр, çухи чалăш. Ку кĕпепе епле урама тухас?

Ахальтен мар ваттисем çиччĕ виç те пĕрре кас тенĕ.

Эх, савăнăç, савăнăç!


Анне мана юратать,

Хĕрлĕ тутăр çыхтарать.

Тутăр хĕрри çӳçеллĕ,

Ун кĕтесси çеçкеллĕ.

 

Йăмăк пуплет ачашшăн,

Ялан манпа вылясшăн.

Унпа вăййа тухатăп,

Çунашкапа туртатăп.

 

Çуна сăртран хăй анать,

Сулнăкалла йăванать.

Савăнатпăр, кулатпăр,

Шур упа пек пулатпăр.

Ак мĕнле эп пысăккă


Ирхине эп вăранатăп,

Хăвăрт-хăвăрт тумланатăп,

Аттепе пĕрле тухатăп,

Физзарядка эп тăватăп,

Музыка янранă майăн

Атте утать сулăмлăн.

Эп унран тăрса юлам-и? —

Ярса пусап çăмăллăн.

Хам сывлатăп вăрăммăн,

Сарăлать ман кăкăрăм.

Ак мĕнле эп пысăккă!

Кĕлеткесем


Мĕн чухлĕ хут,

Мĕн чухлĕ хут

Касса вакланă Хĕветут!

Хутран вăл туна качака,

Вун икĕ сурăх, виç лаша, —

Мĕскер ку?

Вăт так тамаша!

Малта пырать ав пĕр така,

Хăй пуринчен те мăнтăркка, —

Хупланă лартнă кантăка!

Ĕмĕрех пурнать чĕре


Тĕрĕс ĕçшĕн çунса тăнă чух,

Илемлетнĕ чух сăпайлăхпа,

Кăварланнă чух вут-туйăмпа

Ун нихçан вăй-халĕ чакмĕ, çук —

Ĕмĕрех пурнать чĕре!

 

Ярăнать вăл çӳллĕ тӳпере,

Аякри сăрта вăл сăн кӳрет,

Кирлĕ — тарăн тинĕсе анать,

Хăй вăл чышкă пысăкăш кăна —

Ĕмĕрех пурнать чĕре!

 

Кашнине парать вăл юрату,

Пирĕн тăнăç пурнăç никĕсне

Вăл хывать. Калать: «Эс ырă ту,

Пехилле телей пур çынсене». —

Ĕмĕрех пурнать чĕре!

 

Вилĕмлĕ эпир... Никам пĕлмест

Çакă юлашки сехет хăçан?

Пурпĕрех чĕре çĕрте çĕрмест,

Вăл тапать мăнуксенче кайран —

Ĕмĕрех пурнать чĕре!

■ Страницăсем: 1 2 3 4 5 6 7 ... 739